State Council Meeting-ah CM Hawla

Inrinni khan prime minister Narendra Modi hoin Rashtrapati Bhavan, New Delh-ah Inter State Council Meeting neih a ni a; sorkar laipuia minister, state chief minister leh union territory-a lt. governor-te telin, chief minister Lal Thanhawla pawh a tel.

CM Lal Thanhawla chuan, Niti Ayog Governing Council
ṭhut-khawmna hmasa berah Prime Minister-in ram tana a hmathlir zau leh ropui tak a chhawp chhuah thu sawiin, "Heng hmachhawpte tihlawhtling turin Inter State Council hian pawimawhna a nei thui hle. Mizoram chuan Prime Minister hmathlir ropui tak tihlawhting turin theihtawp a chhuah dawn a ni," a ti a; hmachhawpte hlawhtlinna atan sorkar laipuiin kawng tinrengah state-te a ṭanpui leh a chhawmdâwl a ngaih thu a sawi.

Hmarchhak biala thiamna bik (skill) nei chu 5% chauh an nih thu sawiin Lal Thanhawla chuan, "Kum 15 leh 29 inkar 40% vel hna nei lo an awm. Skill development hi ngaih pawimawh zual a ṭul a, hei hian industry leh private sector awm lohna tia sawi theih hmarchhak biala ṭhalai tam tak tan mahni kea ding a, anmahni puala eizawnna kawng a hawnsak thei a ni," a ti.

Ram chhung venhimna chungchang sawiin CM Hawla chuan, "Sakhaw lama firfiakna te, sum leh pai dinhmun a hnufual bikna te, ngaihsak loh bik nia an inhriatna te, ṭhalaite tan eizawnna leh remchanna awm lo lutukte leh hmun ṭhenkhata ram leilung fate dinhmun derthâwng mekte hi tharum leh buaina chhuah tamna chhan ber a ni," a ti a; hmasawnna fuankim leh tluantling a awm leh inrêlbâwlna ṭha neihin eng emaw chen firfiaka chêtna a tihreh theih a rin thu a sawi.

Chief Minister chuan, Mizo-ramin hun khirh tak kum 20 lai a paltlang hnuah remna leh muanna a hmuh thu sawiin, "Remna leh muanna hlu tak kan neih hi theihtawpin kan vawnghim zel a. Tun hnaia Bangladesh-a mifirfiakte chetna chu hmarchhak pum tan a hlauhthawmawm thei a, Golden Triangle kan hnaih avangin ralthuam leh damdawi tawlhrûknate pun belh theihna a awm thei. Chuvangin ramrîte hi uluk leh zuala venhim a ṭul a ni," a ti.