KHAWTHLIR

Thisen pe

Inrinni khan Ramhlun North branch YMA-in Aizawl Civil Hospital tan thisen unit 121 pein, a petute mipa 107 leh hmeichhia 14 an ni a; Tlungvel Students Union pawhin unit 10 an pe. Chawnpui Branch KṬP-in Central KTP Blood Donation Calender angin Synod Hospital tan unit 36 an pe a, a petute mipa 32 leh hmeichhia pali an ni. LIKBK ṭhalai pawl Lawngtlai Chandmary bial-in Lawngtlai District Hospital-ah unit 14
an pe bawk.

Mei zu man

Aizawl Traffic Police-te leh Aizawl District Anti Tobacco Squad ṭangkawp chuan, July 15 khan Aizawla sumdawng lirthei, bungrua leh mihring phur chi-ah COTPA bawhchhiat a nih leh nih loh an enfiah a; taxi, maxicab leh city bus-te an enfiah. Lirthei khalhtu leh passenger dan bawhchhia mi 15 an man a, pawisa an chhawitir. Trafiic Police leh Aizawl ATS-in joint operation an ṭan hnuah COTPA dan bawhchhia mi 90 an man tawh a ni.

Heroin man

YMA sub-headquarters, Serchhip hnuaia Anti Drug Squad (SADS)-te chuan July 15, 2016 tlai khan Chanchinmawia, New Serchhip nia insawi hnen aṭangin heroin can hnih leh a chanve an man. SADS hian Chanchinmawia'n auto-rickshaw hmangin Tuiriala mi heroin a la tih an hriat avangin Chhiahtlang dáiah an lo châng a, SADS hmel a hmuh veleh Chanchinmawia chuan heroin chu a paih a, a hnuah a paihna a sawi a ni.

DIET result

MBSE chuan District Institute of Education and Training (DIET) academic session 2014–2016 chhunga primary school leh middle school zirtirtu training-te result a tichhuak a; DIET Aizawl-a Diploma in Elementary Education (D.El.Ed.) primary section-ah mi 121 zingah 98.4% an pass a, middle section-ah mi 125 zinga 94.4% an pass.

BPL endik

Below Poverty Line (BPL)-ah a awm tur dik takte an awm theih nan tunlai hian Champhai DC Vanlalngaihsaka hoin an district chhungah BPL Baseline Survey neih a ni a, khaw hrang hrangah BPL-a awm tur thlante an endik.