Kohhran leh NGO-a nihna chhuanlama Transfer duh lo an awm thin: HM Zira

Home minister R Lalzirliana chuan, sorkar hnathawk, tlawm-ngai pawl leh kohhrana inhman chhuanlama hmanga transfer an nih dawna kal harsat an awm
ṭhin thu sawiin, chutiang mite chu inngaihtuah chiang turin a chah.

July 15, 2016 tlaia 35th. Batch Mizoram Home Guards & Civil Defence Recruit Volunteers Course leh 8th Batch Excise & Narcotics Department Basic Course training chhuakte'n CTI, Sesawnga passing parade an neih a hmanpuinaah thu sawiin, R Lalzirliana chuan, "NGO leh kohhrana inhman thûk chhuanlam vangin sorkarin hmun danga a sawnna order pawh zâwm thei lo an awm ṭhin a, hei hian kan hnaah kan chian tâwk lohzia a tilang. Kan service-na apiang hi ram leh Pathian tan kan rawngbawlna a ni vek a, NGO leh kohhrana kan nihnate kalsan theih loh emaw tih loh tur," a ti.

Home Minister chuan trai-ning chhuakte chu a lawmpui thu sawiin, "Tunlai khawvel hmasawnnain a ken tel sualna hrang hrang laka ram mipuite vengtu tur in nih angin, in hlawh phû tura ṭha taka in thawh ka beisei," a ti a; India danpui leh hnam puanzar hnuaia an thutiamte nghet taka vuan tlat turin a chah.

Training course hi January 15, 2016-ah ṭan a ni a, 35th Batch Mizoram Home Guards (MRHG) Recruit Volunteers Course-ah hian mi 35, guardman 26 leh women home guard pakuate'n training an zawm. 8th Batch Mizoram Excise & Narcotics (MEN) basic course-ah hian mi 40, mipa 25 leh hmeichhe 15-te'n training an zawm a ni.

Passing out parade-ah hian training laia inelna hrang hranga tiṭhate hnenah lawmman hlan a ni bawk.