Awmpuite hamṭhatna ngaihtuah ṭul an ti

Ferrando Integrated Women Development Centre (FIWDC), Peace Home leh an thurualpuite chuan Inrinni khan Aizawl Press Club-ah thuthar thehdarhtute an kâwm a; Mizote’n ‘awmpui’ tia an sawi, domestic worker-te chungchang sawiin, awmpui hna chu hna zahawma siam a nih theih nana hmalak a ṭul thu an sawi.

FIWDC Peace Home hotute chuan, domestic worker-te nihna sawiin, mi ina inhlawhfaa khawsa leh hun bik neia in chhung sekrek khawiha inhlawhte chu hna dang thawk ang bawka hna thawk an ni tih an sawi.

Mizoramah awmpuite'n an-mah-ni chhawrtute aṭangin rahbehna an tawk a, harsatna dang dang an tawk ṭhin tih sawiin, "An thâ leh zung, thiamna leh remhriatna neih ang angte hmangin niléng zankhuain mi hausa zawkte’n chhawrin, an phû tâwk hlawh pek erawh a tam zawkin an hreh leh ṭhin," an ti.

FIWDC Peace Home hotute sawi danin, International Labour Organisation (ILO) Convention 189-nain domestic worker-te humhalhna dan a siam a, chu chu India ramin a la pawm ve lo. Chutih rualin, state ṭhenkhat, Maharashtra leh Tamil Nadu-ahte chuan domestic worker-te tan Board din a ni a, domestic worker-te hamṭhatna leh humhimna dan an siam a ni.

FIWDC hian kum 2009 khan Aizawlah baseline survey an nei a, chutah chuan chhungkaw 200 awmpui neite leh an awmpuite an kâwm kual a ni. Survey report-a a lan dan-in, Mizorama awmpuite chu hmeichhia an ni deuh vek a, thingtlang khaw kilkhawr tak tak aṭanga retheihna vanga inhlawhfa an ni tlangpui.

FIWDC hotute chuan, Mizo nula, lehkha zir tawh si lo, hna nei si lo tam tak an awm tih sawi-in, chung mite tan chuan awmpui hna chu inhlawhna ṭha tak a ni tih an sawi a, "In chhung sekrek khawihtu tur mamawhna a sang hle a, mahse, Mizo nula tam takin an thawk hreh ṭhin. A chhan chu, he hna hi hna tak tak anga kan ngaih loh vang a ni a, kan mamawh inphurhûk tawn turin awmpui hna chungchanga kan ngaihdan thlak a ṭul hle a ni," an ti.