2018 inthlanah sorkarna siam ngei kan inring - MNF

MNF general headquarters office bearer-te chu nimin khan an president Zoramthang hoin Mizo Hnam Rûnah an ṭhukhawm a; kum 2018-a Assembly inthlan awm turah an party-in hnehna an chan ngei an rin thu an tarlang.

Hmarchhak state hrang hranga political party-te'n Nort East Democratic Alliance (NEDA) an din chu lawmawm an tih thu tarlangin, MNF OB-te ṭhukhawm chuan, "NEDA hmang hian hmarchhak state hrang hrangah hmasawnna a thlen ngei kan beisei. North East-ah sorkarna chelh rei ber, Indian National Congress hian NE mipuite mamawh a phuhru zo lo a, ram mipui retheih zualna state kan ni hi vanduaithlak kan ti," an ti a; NEDA hmangin hmarchhak state-te'n state dang ruala hmasawnna lamah ke an pên an beisei thu an sawi.

MNF OB ṭhukhawm chuan, "NEDA-a tel party hrang hrangin mahni party din chhan leh thil tum pakhatmah paih bo lo a, thawhhona thukhat vuaa chak taka ke a pên tur hi Mizo mipuite beiseina thlentu a nih kan ring. NEDA hmalakna apiangah theihtawpa thawh chhuah ṭha kan ti a, Mizo mipuite pawh thlawp ṭheuh turin kan ngen. Chuvangin, kum 2018-a MLA inthlan neih turah pawh hnehna sang tak kan neih ngei kan ring tlat a ni," an ti.

MNF meeting chuan MNF president Zoramthanga'n Myanmar Peace Mission atana hna a thawh chu ropui an tih thu tarlangin, "Sorkar laipui mi rin leh remna palai hna thawk tura hruaitu tling, ram dang sorkar leh an underground hruaitute pawhin an rin em em president kan nei hi lawmawm kan tiin kan chhuang a ni," a ti a; Zoramthanga'n remna nei tura hna a thawhsakte'n hlawhtlinna an chan ngei an beisei thu an sawi.