SSC coaching batch hnihna hawng

Mizoram Youth Commission (MYC) leh Excel thawk dun-in, Aizawla Staff Selection Com-mission (SSC) coaching an kalpuia a batch hnihnate lawm luhna inkhawm nimin khan New Secretariat-a MYC Hall-ah neih a ni a; Finance minister Lalsawta leh Women Commission chair-person Vanlalawmpuii Chawng-thu, MLA-te'n an hmanpui.

Minister Lalsawta chuan, zir-laite'n tih tak zetna rilru put a ngaih thu leh dâwngdah a rem loh thu a sawi a; zirlaite chu an zir hun chhungin thil danga inham buai lo tur leh an tum ram an thlen hma chuan thil dang ngaihtuah tur te, an hotute zah tur leh Mizoram leh hnam chawimawitu ni turin a chah.

Lalsawta chuan, mihringte hmelma ber chu chapona a ni tih sawiin, "Chapona hian a daih rei thei lo a, thuawihnain hlawhtlinna kawngah mi a hruai ṭhin," a ti a; zirlaite chu hlawhtling ngei turin duhsakna a hlan a ni.

C Vanlalawmpuii Chawngthu pawhin thu sawiin, MYC hnathawh chu ropui a tih thu sawiin, "Sum sen tur tam takah sorkarin a dâwmkanpui nasa a, ṭhalaite hi lawm tur kan ni," a ti. Zirlaite chu ngaihsan tur dik hre tura chahin, "Mi neinung leh mi lârte hi ngaihsan tur an ni ber lo a, mi dik leh mi rinawm, mi taimate hi ngaihsan tur dik an ni," a ti.

Vanlalawmpui chuan, social media-a thu hriat leh hmuh zawng zawngte awih mai loh tur te, docu-ment leh finfiahnate an hmu a nih loh chuan awih mai lo a, thu dik hriat tum turin training turte a chah.

MYC chairman T Sangkunga sawi danin, SSC coaching atan hian MYC leh Delhi-a hmunpui nei Excel-te chuan nikum khan thawh dunna thuthlung an ziak a; nikum khan Aizawlah Excel centre 13-na din nghal niin, zirlai 168 an awm. Kuminah an ṭan thar leh a, zirlai 282 an admit tawh.

SSC coaching atan hian zirlai pakhatah Rs. 9,000 a ngai a, Rs. 6,000 chu sorkarin tumin, Rs. 3,000 chu zirlaiin a tum thung. Zing, chhun, tlaiah class an kal a, thla thum leh a chanve chhung an zir a ni.

T Sangkunga chuan, Excel-te chu an ṭha tâwka an ngai thu sawiin, SSC-in kum khatah graduate level-ah hmun hrang hranga thawk tur mi 20,000 vel an lak ṭhin thu a sawi a, "SSC exam buatsaih leh hmasak berah chuan kan zirlai eng emaw zat an tlin ngei kan beisei," a ti.

MYC hi IAS coaching atan ALS nen an thawkho mek bawk a, coaching batch khatna zo tawhn batch hnihna tur an buaipui mek.

IAS coaching-ah hian batch khatnaah zirlai 68 an awm a; zirlai pakhat fee atan Rs. 82,000 a ngai a, chung zinga Rs. 60,000 chu sorkarin tumin, Rs. 22,000 chu zirlaiin a tum a ngai thung.