ZNP-in Chakma lût rûte ngaithiam lo

ZNP president Lalduhoma chuan, Chakma te chu India ram dan bawhchhiaa a rûka Mizo-rama lutte an nia sawiin, "Mizote min tibuai zel dawn a nih chuan kan ngaithiam dawn lo," a ti.

Nimina ZNP pisaa inkhawmah thu sawiin, Lalduhoma chuan, “Chak-ma te, an pi leh pu aṭanga Mizorama awm tawh leh an thlah kal zel, India khua leh tui dik takte chu kan zah a, political party tinte pawhin kan policy-ah hnam tênau zawkte humhalh tih hi kan aupui vek a ni," a ti a; India ram dan bawhchhia a, a rûk a rála Mizorama lutte’n Mizote hêk a, an tibuai zel dawn a nih chuan ZNP-in an ngaithiam dawn lo tih a sawi.

Lalduhoma chuan, India khua leh tui dik tak Chakmate chu ramri kâna dan loa Chakma lo lutte venpui turin an phût tih a sawi a, "Tuna min tibuaitute lakah hian an thîkthu an tihchhiat ve pawh a hun tawh. Chakmate hi UN-in an chanvo leh dikna a pek angin an mahni ram Bangladesh-ah zalen taka an chen hi kan duhsak a ni,” a ti.

ZNP President chuan, Mizoram hmun hrang hranga sawhthing chíngtute’n hralhna an hriat loh avangin an dah ṭawih mek nia sawiin, "Kut hnathawktute thawh rah a thlawna a luan ral lohna tur veitu, a hralhna tur market leh a man pawh puang ngam party vote lo a, an sorkar an rin vanga an vote leh mai ṭhin avanga hetiang dinhmun thleng kan ni," a ti a; chu chu kut hnathawktute'n hre nawn leh se an duh tih a sawi.

Lalduhoma chuan, sawhthing hralh theih loha ṭawih chhe mek chu hmuh hrehawm an tih thu leh kut hnathawktute thawh rah a luan ral mek laia sorkar a ngawi reng thei chu mak an tih thu a sawi a, "Kuminah chuan lei hman a ni tawh lo a, a ṭawih ral mek a ni. Kum tharah chuan sorkar hian ngaihtuahna thar hmanga kut hnathawktute thawhrah a thlawna a luan ral tawh loh nan ruahmanna siam turin kan ngen a ni,” a ti.