Nurse hrem dan tur puan hun sawn

September 2014-a Lunglei Civil Hospital-a Vanlalkunga leh Lalchansangi, Lunglei Venglai te fa piang hlim thihna chungchanga Lunglei District Court-in thiam loh a chantir tawh, nurse Lalbiakdiki w/o Vanlalpeka Ngente hrem dan tur puan hun chu July 20, 2016-ah sawn hlat a ni.

Tarlan tawh angin, Sangau Primary Health Centre-a thawk mek Lalbiakdiki hi Lungleia chief judicial magistrate Dr HTC Lalrinchhana chuan thiam loh a chantir a, hrem dan tur puan hun atan nimin kha ruat a ni. Mahse, Lalbiakdiki chu Lunglei Civil Hos-pital-ah enkawl mek a nih avangin a ukilin a ngen angin, Court chuan a hrem dan tur puan hun chu a sawn hla leh ta a ni.

Lalbiakdiki hi Court-in July 13, 2016-a thiam loh a chantir hnuah Lunglei District Jail-ah tàntir nghal a ni a; mahse, July 14-a Court-a a inlan leh laiin nikhaw hre loin a tlu a, Lunglei Civil Hospital-ah enkawl nghal a ni.

Court-in Lalbiakdiki hrem dan tur chu nimina puan a tum avangin nimin chawhma lam aṭang khan Court tualah nurse eng emaw zat an pungkhawm a, rorelna dik an duhna thuziakte an keng lang a; Court-in a hremna tur puan hun a sawn hlat thu an hriat hnuah an ṭin darh.