2015-16-ah Taxation-in chhiah Rs. 2,49,76,09,344 hmu. Hnathawhna tur lirthei nei se chhiah an khawn hnem thei zawk ang em?

Taxation department chuan sorkar kum liam ta, 2015-16 chhung khan Taxation department chuan chhiah Rs. 2,49,76,09,344 an hmu.

Hetihlai hian hun rei tak aṭangin chhiah an khawnna tur lirthei sorkarin a pek theih loh avangin chhiah khawn kawng-ah harsatna an tawk nia thu dawn a ni.

Taxation department hotute chuan, lirthei an neih ṭhat tâwk loh vangin district hrang hranga Taxation mite'n thingtlang lamah chhiah an khawn thei lo ṭhin niin an sawi a; a theih ang anga lehkhate pea hmalak ni mah se, lirthei an neih loh vangin bawhzui a harsa nia sawiin, "Sorkar hian hnathawhna hmanrua min pe ṭha se chuan chhiah khawn lamah hlawhtlinna sang tak kan nei leh zual ang," an ti.

Taxation department hotute sawi danin, kum 10 kal ta aṭang khan thingtlang hmun hrang hranga dawrkai, cable TV ope-ra-tor-te leh thil dang aṭanga chhiah an khawn turah harsatna an tâwk a; sorkarah lirthei an dil mek.

District hrang hrangah Taxation-in chhiah an khawn ṭhat theih loh avangin dawr-kaite leh cable TV operator-te'n chhiah an âwl fo a; a theih ang anga an khawn cháng pawhin mi ṭhenkhat chuan chhiah an àwl rei tawh avangin an lo hrethiam lo fo a ni.

Chhiah khawn turin mimal lirthei hmangin feh chhuah cháng an nei a; mahse, sorkar aṭangin lirthei man pek an ni ngai lo a, petrol man bak pek an ni ngai lo.

Taxation department hian prosfessional tax, central sales tax, value added tax, POL leh entertainment tax-te an la a; central sales tax (CST) chu Mizoram aṭanga thil thawn chhuah, chhiah lakna chia an lak a nih avangin a tam lo a, bâwng vun la khawma phaia thawn chhuak ṭhin mi tlemtê hnen aṭang chauhin an la a ni.

Entertainment tax-ah hian cable TV, football inkhel, concert, lucky ticket, man neia ennawm chhuah leh thil dang aṭangin chhiah lak a ni a; mahse, thil
ṭhenkhatah mi dang ṭanpui tura thil huaihawt a nih avangin chhiah âwl tur leh tihniam tura ngenna an dawn nasat avangin chhiah lut a tlem phah tih an sawi.

Sorkar hnathawkte'n chhiah inang tlang an pek professional tax chu mi pakhatin kum khat-ah Rs. 2,500 an pe a, sorkar hnathawk nghet lo muster roll leh contract-a thawkte chu professional tax pe tura danin a phût chin an hlawhin a phak loh avangin âwl an awm nual a, a hlawh sang chinte chuan an pe tho bawk. Professional tax-ah hian dawrkai, contractor, supplier, hotel, parlour, restaurant leh a kaihhnawihte chu kum khat zel atan chhiah an pek tur bithliah a ni.

POL (petrol leh diesel) man a inthlak fo avangin POL bikah kum kal ta khan an target an pha lo a, estimate pawh an tihdang-lam phah. POL man a hniam fo avang hian nikum khan budget estimate chu cheng vbc. 233-ah an tihhniam a ni. Chutih laiin, kum tawpah chuan cheng vbc. 249 chuang an hmuh tho avangin budget an khûmna chu cheng vbc. 16 a ni.

Taxation department hotute chuan, chhiah lâk a tam zawk theih nan Aizawlah inspection squad din ni se an duh thu an sawi a; inspector, UDC, LDC, checker leh post ruak tam tak an neihte chu sorkarin hnawhkhahsak se an duh thu an sawi bawk.

Sorkar kum kal mek 2016-17 atana Taxation department-in target an siam chu cheng vbc. 240 a ni a; kumin April-June chhung khan cheng vbc. 69 chuang an hmu tawh a ni.

Kum 9 chhunga Taxation chhiah lak zat

Kum Profession Tax Sales Tax Entertainment Tax TOTAL

2007-08 Rs. 5,21,97,413 Rs. 64,47,18,179 Rs. 34,61,787 Rs. 70,03,77,379

2008-09 Rs. 5,63,12,381 Rs. 77,57,46,649 Rs. 32,24,453 Rs. 83,52,83,483

2009-10 Rs. 7,73,81,614 Rs. 80,32,87,261 Rs. 38,59,450 Rs. 88,45,28,325

2010-11 Rs. 8,36,48,781 Rs. 1,05,13,08,206 Rs. 47,62,177 Rs. 1,13,97,19,164

2011-12 Rs. 11,67,78,191 Rs. 1,37,37,65,833 Rs. 43,80,136 Rs. 1,49,49,24,160

2012-13 Rs. 13,69,98,014 Rs. 1,71,13,44,604 Rs. 45,85,568 Rs. 1,85,29,28,186

2013-14 Rs. 14,88,46,468 Rs. 1,85,07,84,572 Rs. 48,17,659 Rs. 2,00,44,48,699

2014-15 Rs. 14,34,08,188 Rs. 2,11,97,12,907 Rs. 97,83,130 Rs. 2,27,29,04,225

2015-16 Rs. 15,38,58,822 Rs. 2,33,60,36,793 Rs. 77,13,729 Rs. 2,49,76,09,344