Champhaiah winery-ah Grape an her ṭan

Champhai Grape Growers Society (CGGS) - te chuan kumina atan grape an her ṭan a, hemi pual hian Champhai Winery, Tlangsamah tun hnai khan inkhawm an buatsaih.

Inkhawm hi CGGS vice chairman HS Lalfak-zuala'n kaihruaiin, an hun hman puitu Champhai SBI manager Savi Prasad Sharma chuan Champhai hmasawnna tur pakhat, winery bun a nih theihna tura CGGS-te hmalakna chu a fakawm a tih thu sawiin, "In hmalaknaah duh angin hlawhtlinna nei ṭhin lo mah ula, beiseina sang tak ka nei. Hlawh-tlinna in hmuh theih ngei ka beisei a ni," a ti.

Savi Prasad Sharma chuan winery a hlawh-tlin theihna tur chuan thil pathum, a hralhna ngaihtuah, thil siam chhuah quality tih ṭhat leh thil siam chhuahna tur bung-raw tam zawk lak dan dapte chu pawimawha a hriat thu a sawiin, "Winery-in wine a siam chhuahte chu vawrhlarna ngaihtuah te, a tuamna leh a funna thlenga uluk a
ṭul," a ti a, ram dang aṭang-
a in tur dang rawn lut anga a hralhna ngelnghet leh zau zawk dap thiam a pawimawh thu a sawi.

CGGS-te hian an member-te hnen aṭanga grape rah an lei leh ṭan tawh a, kg. khat Rs. 30 zela leiin, quintal 33.92 vel an le tawh. Grape hi Thawhlehni leh Zirtawpni apiangin an lei
ṭhin ang.

CGGS-te hian hmar lamah Ngur, chhim lamah South Khawbung thleng an tuam a, zirchianna an neih danin kumin hian grape quintal 2201 vel an member-te hnen aṭanga an lei theih an inbeisei.

Nikum khan grape hi quintals 1680 an lei a, hengte hi a tui an sawr hnuah M/S Radiant Company, Guwahati hnenah inremna an neih angin an hralh ṭhin a ni.