Tuna USA-a ka kal chhan ber hi inpumkhatna zawng turin a ni - CM

Chief minister Lalduhoma chuan, Zo hnahthlak pêng hrang hrangte chu inṭhen thei an nih loh thu sawiin, USA-a a kal chhan ber pawh inpumkhatna zawng turin a nih thu leh, engtikah emaw chuan Zo hnahthlakte chu rorelna pakhat hnuaiah an la dinchhuah a rin tlat thu a sawi.

CM Lalduhoma hian September 4, Nilaini khan Chin Community of Indiana-in Indianapolis, USA-a inkhawm (Town Hall Meeting) an buatsaihah thu a sawi a, "Tuna USA-a ka lokal chhan ber hi inpum­khatna kawng zawng turin a ni. Unau kan ni a, inṭhen thei kan ni lo tih hi ka chah nawn leh duh che u. Engtikah emaw chuan hnama min dintu Pathian chakna hmangin hnam ropui tak ni turin, rorelna pakhat hnuaiah kan la ding chhuak ang tih i ring tlat ang u," a ti.

Ramin ramri a nei a, hnam erawh chuan ramri a nei lo tih sawiin Lalduhoma chuan, "Sorkar pathum hnuaia dik lo taka ṭhehdarha kan awm hi engtik lai mahin kan pawm ngai lo ang," a ti a; inpumkhatna thinlung pu ṭheuh tur leh 'Chakna ni loin, thiltihtheihna ni hek loin, ka thlarau zawkin le' tiha innghat chunga Pathian hnena ṭawngṭai zel turin a chah.

Lalduhoma chuan, USA-ah Zo hnahthlak ṭhahnem tak an awm a, Indianapolis-ah ringawt pawh mi 30,000 chuang an awm tih sawiin, "USA citizenship nihna nei leh voting right nei pawh ṭhahnem tak kan awm tawh," a ti a; ṭan rual nachang an hriat chuan politics-ah ngaih pawimawh tham an nih thu a sawi.

Mizoramah kohhran inpum­khatna turin hmalak mek a nih thu sawiin CM Duhoma chuan, "Tunah chuan kohhran hrang pariatte'n Churches Council an din thei dawn ta a, October 27, 2024 hian Mission Veng biak-inah hawn a ni dawn," a ti.

Chief Minister chuan, USA-ah pawh Zo zingah kohhran pawl hrang a tam a, Maryland-ah ringawt pawh kohhran 20 vel a awm nia a hriat thu sawiin, "Kohhran hi inpumkhatna aiin inpumkhat lohna thlentu a ni ang tih hi a hlauhawm khawp mai," a ti a; USA-a Zo kohhrante chu an pawl ṭheuh ṭhiat kher loin, kohhran pawlte'n thawhhona huang din thei se a duh thu leh, tlawmngai pawl (NGO) khaikhawmtu pawl pakhat din thei se a duh thu a sawi.