MNYF-in Aizawl kawng chhe lai an hnawh

Mizo National Youth Front (MNYF) chuan nimin khan Aizawl khawpui chhunga kawng chhiate hnatlangin an thawm ṭha a, a rang thei ang bera kawng siam turin sorkar an phût.

MNF ṭhalai huaihawt hna­tlangah hian Canteen kual, Vanapa Hall bul leh Khatla kâwn leh a chhehvela kawng chhe laite an thawm ṭha a; Vanapa Hall kawta hnatlang bul ṭannaah MNF treasurer Lalruatkima chuan, "ZPM sorkar hian Bangladesh of the East-a min chhuah hma ngei hian inen lêt se, a rang thei ang bera kawng siam hna thawk turin kan phût a ni. Kawng hi ṭawngkam thiamna hmanga sawi mâm theih a ni lo," a ti.

Lalruatkima chuan, Aizawl khawpuia kawng chhia chu MNF sorkar laia siam a nih thu sawiin, "MNF sorkar khan nasa takin kawng a siam ṭhin a, kan kawng pawh a ṭha ṭhin. Hun a lo kal deuh a, traffic heavy lutuk avangin kan kawng siamte chu kum tin danin repair a ngai ṭhin," a ti a; ZPM sorkarin kawng siam chu sawi loh, kawng siam sa pawh an thawm ṭha thei lo niin a sawi.

Lirthei khalhtute'n kawng khuar dai hlaua kawng ṭha lai an zawnna khawpuiah traffic a jam nasa tih sawiin Lalruatkima chuan, "Sikul naupangte'n sikul an tlai phah nasa a, traffic police-te an hah phah em em. Mawhphurtu PWD Minister hi a bo nge, hmalak ngaihna a hre lo zawk. Hnatlangin kan zawn a ngaih palh a va hlauhawm ve le," a ti.

MNF Treasurer chuan, Mizoramah ruahtui a tam avang-in kawngpuite chu working season apiangin thawmṭhat a ngaih thu te, ZPM sorkarin working season chhungin kawng siam an ngaihthah thu te, chhiah tihpun loh tiam-tute'n chhiah an tihpun thute a sawi bawk.

MNYF vice president Lalnunmawia Pautu pawhin thu sawiin, Aizawl khawpui kawng chhia an ngaimawh avangin a chhe zual lai siamṭhat hnatlang an ko niin a sawi a; traffic an tih jam nasat leh nunphung an tihkhaihlakah mipui hriatthiamna a ngen a ni.