Tui pût vilna tur moblie app tlangzarh

Public Health Engineering (PHE) minister Prof. Lalnilawma chuan nimin khan PHE Engineer-in-Chief pisaa meeting hall-ah PHE tui pipe aṭanga tui pût vilna tur, 'Water Leakage Reporting Software System' a tlangzarh. Water Leak Reporter application hi Playstore leh Appstore aṭangin lak (download) theih a ni.

PHE Minister chuan, tui lak khawm, hman tlak tura sâwngbâwl leh rualkhai taka sem zai chu mihring dam khawchhuah nana thil pawimawh berte zinga mi a nih thu sawiin, "PHE department-te'n thiamna thar hmang ṭangkaia sâwt zawka hna kalpuina tur Water Leakage Reporting Software System tihlawhtling tur hian PHE-a thawktute leh mipui an ṭanrual a pawimawh dawn a ni," a ti.

Thlipui leh ruahpui avangin mipui mamawh phuhru tura hna thawhnaah PHE-in harsatna hrang hrang an hmachhawn thu sawiin Prof. Lalnilawma chuan, "Tui pump khawl tana ṭha lo khawpin tui a nu ṭhin a, vawiin (Sept. 5) pawh khan tui nut dan chu Nephelometric Turbidity Unit (NTU) 169 a ni," a ti a; mipui mamawh phuhru turin theihtawp an chhuah thu a sawi.

PHE Minister chuan, tui pût vilna software chu hun eng emaw chen Aizawl khawpuiah enchhin a nih dawn thu leh, hman ṭangkai dan azirin district dangah pawh hman a nih tur thu a sawi bawk.

Water Leakage Reporting Software System hi PHE department leh Buannel Geo Solution & Services buatsaih a ni a; Water Leak Reporter application hmang hian PHE-a thawkte hnenah phone kaltlangin tui pûtna thlalak thehluh tur a ni. Apps hmanga PHE thawktute hnena tui pût report ṭhate hnenah lawmman siam tum a ni.