Zirtirtu hna hi hna thianghlim a ni - Education Minister

Education minister Dr Vanlalthlana chuan nimina Teacher's Day (Zirtirtute Ni) pualin thuchah a tichhuak a, "Zirtirtu hna hi hna thiang­hlim a ni," a ti.

Dr Vanlalthlana chuan, zirtirtu hna chu a pawimawh hle tih sawiin, "Nakin maia kan ram hruaitu la ni tur leh eizawnna kawng zawh thei tura zirlaite kawng kawh­hmuh a, nun kawng dik zirtirna hna ropui a ni. Chuvangin, sorkarin an pualin ni bik a siam hial a ni," a ti a; zirtirtu hna chu hna thianghlim a nih avangin zirlaite mai bakah mipui vantlang tan pawha entawn tlak leh mi rinawm ni turin zirtirtute a ngen.

Zirna hmanga mihring hman tlak leh mi puitling chher chhuak turin sorkarin theihtawp chhuahin sum leh pai sêng ṭhin mah se, zirtirtute inpekna tel lo chuan a hlawhtling thei lo tih sawiin Minister chuan, "Vantlang mipui leh ram hmasawnna leh changkanna hi zirnaah a innghat a, chumi hnukpui ber leh innghahna laimu chu zirtirtute an ni. Chuvangin, Zirtirtute Ni a lo thlen hian zirtirtute hnenah lawmthu ka sawi a ni," a ti.

Dr Vanlalthlana chuan, Mizoram sorkarin zirna hi ram leh hnam hmasawnna bulṭhut a nih avangin a ngai pawimawh tih sawiin, "Zirna tihhmasawn nan theihtawp chhuah mek a ni. Zirtirtute hi zirlaite tan chuan kawng hrang hranga thiamna petu an nih avangin an nungchang zirlaite'n an entawn a, an la chhawng mai zel," a ti a; ṭhalai leh zirlaite ruih theih thil laka an fihlim theih nan zirtirtu chu ruih theih thil laka fihlim turin a chah.

Education Minister chuan, zirna chu mihring hman tlak, chhawr tlak, eizawnna leh thiamna hmanga mahni kea ding thei tura inbuatsaihna a nih thu sawiin, "Zirlaite chu khua leh tui ṭha, khawtlang leh ram tana ro tling ni tura chher chhuah hi zirnain a tum pawimawh ber a ni," a ti a; Zirtirtute Ni vawi 63-naah hian zirtirtu zawng zawngte an thlen chin aṭanga hmasawn turin a ngen a ni.