KHAWTHLIR

MIRSAC website

Mizoram Remote Sensing Application Centre (MIRSAC) website leh data order portal chu nimin khan Directorate of Science & Technology-ah tlangzarh a ni. MIRSAC website leh data order portal kaltlang hian mipuite'n MIRSAC data pawimawh chi hrangte awlsam takin an order thei tawh dawn a; hre chiang duh tan MIRSAC website mirsac.mizoram.gov.in leh data order portal - data.mirsac.in ahte luh tur a ni.

Heroin man

Assam Rifles leh Champhai police-te chuan September 3, 2024 khan Hnahlan huam chhungah heroin (no. 4) gram 51 an man a, a kawltu Myanmar lam mi pakhat an man bawk. Heroin an man hi Rs 35,70,000 vel hû a nih thu AR chuan an tarlang.

MRB-in sikul pe

Mizoram Rural Bank branch hrang hrang 105-te chuan nimin khan Zirtirtute Ni lawmna atan sikul 420-ah cake an pe. Corporate social responsibility kaltlangin sikul 27-ah tui thianghlim dah vawhna, lehkhabu báwm leh computer an pe bawk.

Ganja kg. 77 man

Central YMA Kumpuan Committee, Excise & Narcotics Department leh Mizoram Police (Special Branch)-te ṭangho chuan nimin zing dar 2:30 vel khan Durtlang kâwn venga dawr chhungah ganja kg. 77 an man. Ganja hi Meghalaya aṭanga maxicab MZ-04 A-2996-in a phurh chhoh a ni a, maxicab aṭanga hlân thlak hnuah dawr chhungah an man a ni.

Dan thar inzirtir

Lunglei police-te chuan nimin khan SP conference hall-ah Lunglei District VDP Coordination leh Lunglei district-a village defense party (VDP) unit hruaitute tan criminal law thar pathum zirhona an buatsaih. Zirhonaah hian Lungleia VDP member 51 an tel a; Bharatiya Nyaya Sanhita, Bharatiya Nagarik Suraksha Sanhita leh Bharatiya Sakshya Adhiniyam chungchang an inzirtir a ni.