Power Minister-in central ministry a dawr

Power & Electricty minister F Rodingliana chuan nimin khan Delhi-ah power sector hnuaia sorkar laipui ministry-te a dâwr a, Mizoramin kawlphetha a siam chhuah tipung tura sorkar laipui aṭanga puihna awm theite a sawipui.

F Rodingliana hian Power secretary Pankaj Agarwal kâwmin, project leh nizung chakna hmanga Mizoramin kawlphetha tam zawk a siam theih dan tur leh central aṭanga puihna awm theite a sawipui a; Mizoram power infrastructure tihchangtlunna tur project hrang hrang Power Ministry-a thehluhte a rang lama pe turin a ngen.

Power Minister hian Ministry of New & Renewable Energy secretary Bhupinder Singh Bhalla pawh kâwmin, sorkar laipui aṭanga small hydel project siamna tur ṭanpuina awm ṭhin, kum 2017-a tihtawp tâk chu tuaithar leh vat a nih theih nan hma la turin a ngen. Bhupinder Singh Bhalla chuan, tun aṭanga rei lo têah central cabinet pawmpui tura buatsaih theih a inbeisei thu a lo hrilh.

F Rodingliana chuan Rural Electrification Corporation chairman Vivek Kumar Dewangan a kâwm bawk a; RDSS scheme hnuaia hnathawh mek leh hmabak la awm te, sorkar laipui aṭanga sum la pek chhuah loh awmte pek chhuah a nih dan tur a sawipui a ni.