Chief Minister-in USTDA hotu a kâwm

Chief minister Lalduhoma chuan September 3, 2024 khan Indo-Pacific US Trade & Development Agency (USTDA) regional director Verinda Fike chu a pisaah a kâwm a; Mizoram tana hmasawnna hna thawk ve tura sâwmin, rawtnate a thlen.

CM Lalduhoma'n Mizoram tana USTDA-in project lian tham a neih theih a sawipui chungchangah Verinda Fike chuan, a changtu bik department-te a enfiahtir ang a, bawhzui zel tlaka an ngaihte chu a thlawnin master plan leh pawimawh dangte an siamsak theih thu a lo hrilh a; USTDA aiawha India ram enkawltu bik be nghalin, hma lo lâkpui turin a chah a ni.

USTDA hi US sorkar enkawl niin, khawvel hmun hrang hrangah hmasawnna hna an thawk ṭhin a; infrastructure and services, clean energy and power, transportation, information and communications technology leh healthcare lamahte an thawk nasa hle. Hna thawhna sumte chu loan anga kalpui loin, grant-in-aid angin an kalpui ṭhin a ni.