Teacher's Day lawmna hmanpui

Aizawl South-II bialtu MLA Lalchhuanthanga chuan nimin khan a bial chhunga 3rd MAP English Medium School-in Teacher’s Day an lawmna a hmanpui a, Teacher’s Day lawmpui nan Rs 10,000 a pe.

Lalchhuanthanga chuan, nu leh pate'n beiseina sang tak neiin harsa chung chungin an fate sikul an kaltir tih sawiin, "Chhungkaw dinhmun inchen lo tak takte an ni a, in lama zirtirna dawng ṭha leh dawng ṭha lem lo, mi chi hrang hrangte thlei hrang loa angkhat veka khairual taka lo enkawl hi zirtirtute mawhphurhna pawimawh tak a ni," a ti a; naupangte zirna ṭha pek chu nu leh pa leh zirtirtute mawhphurhna a ni tih hria a, ṭan la thar turin zirtirtute leh nu leh pate a chah.

AMC Ward-XVI corporator R Lalawmpuii, ZPM Zonu president pawhin a bial chhunga Bethlehem Vengthlang Middle School II-in Teacher's Day an hman a hmanpui. R Lalawmpuii chuan, zirtirtute chu ram leh hnam hma hun siamtu an nih avangin an dinhmun a pawimawh hle tih sawiin, "Zirlaite thiam loh zirtirtu ni mai loin, an nun kaihruaitu role model an ni... Eng hna pawh rinawm leh taima taka thawh chuan a ropui em em vek a, zirtirtute hian kan nunah hmun pawimawh an chang lehzual bik a ni," a ti.