Walking test nei turte vailiam

Environment, Forest & Climate Change (EFCC) minister Lalthansanga chuan nimin zing khan EFCC department-a thawk tur forester 15 leh forest guard 25 lak tura walking test nei turte chu Mualpui Zero Point aṭangin a vailiam.

EFCC Minister chuan, walking test nei turte chu theihtawp chhuah tur leh dan zâwm turin a chah a, "In tling a nih chuan rinawm takin thawk ang che u," a ti a; an tling lo a nih pawha beidawng lo turin a chah.

Walking test-ah hian darkar 4 chhungin mipain km. 25 leh hmeichhiain km. 14 an thlen hman a ngai a, kawng lakah check point eng emaw zat awmin, check point-ah coupon lak zel tur a ni.

Forester leh forest guard lak turah hian candidate mi 3,000 chuang an awm a; September 3 aṭang khan walking test neih ṭan niin, nimin kha ni thumna a ni a, ni li chhung neih tura ruahman a ni.