Speaker motor lei leh bangla chei a ṭulna vanga ruahman a ni - ZPM

ZPM Ṭhalai Headquarters hruaitute chuan nimin khan Aizawl Press Club-ah thuthar thehdarhtute an kâwm a; Assembly Speaker bangla chei ṭhat leh lirthei thar lei chu Speaker-in ama thua a tihtir a nih loh thu leh sorkarin a ṭulna avanga a ruahman a nih thu an sawi.

ZPM Ṭhalai hruaitute chuan, Speaker-in office a luah tirh tê aṭangin official lamin lirthei lei ṭul tihna leh rawtna an thlen tawh niin an sawi a, "Speaker hian motor thar lei rawtna chu a hnial ṭhin a, sorkarin motor thar lei loh hram tur a tih avangin thla li chhung chu motor hlui vek hman a ni. VIP motor a indaih loh tâkah chuan a thar lak a ngai a, kalphungah order of preference-in Speaker chu first priority pek niin, motor lak thar a chang ta a ni. A motor kawi lai chu Opposition Leader-ah a tawlh thla ve thung," an ti.

Speaker motor thar chu tum vang reng ni loin, a ṭulnain a ur thlûk vanga lei a nia sawiin ZPM Ṭhalai hruaitute chuan, "Speaker hmasa motor ang tho Mahindra XUV 500 book a ni a, XUV 500 a chhuah tawh loh avangin a thlaktu XUV 700 lak a ni," an ti a; to uchuak leh ṭha eltiang a nih hriat a nih loh thu leh mimala nei pawh an awm nual thu an sawi.

ZPM Ṭhalai hruaitute chuan, Speaker hian a bangla chu a cheitir lo nia sawiin, "Sorkarin a ruahman sa a ni. Speaker luh hma hian banglaah khum, dining table, chair, refrigerator leh bungraw nepnawi tlem bak a awm lo. PWD-in furnishing atana cheng nuai 15 an sanction aṭangin bungraw hraw zual - khum, sofa set, almirah, fridge etc. te a ruahman. Assembly Secretariat aṭangin cheng nuai 11.90 sêngin in chhung bungrua leh khawsakna hmanrua lei a ni," an ti.

Speaker banglaa bungruate chu list fel tak siam a nih thu te, Speaker aiawh leh department official-te'n joint inspection neiin hming an ziah vek thu te, bangla office bungrua/hmanrua atan cheng nuai 2.29 sèn a nih thu te, list hmangin Speaker-in bangla a chhuahsan leh hunah pawh bungruate chu a dinhmun enhoa inhlan chhâwn leh vek tur a nih thu te, pastor quarters chhuahsan anga felfai taka chhuahsan tura ruahmanna siam a nih thute an sawi bawk.