Kawngpui siam ngaihthahah MPYCC-in ZPM sorkar an puh

Mizoram Pradesh Youth Congress Committee (MPYCC) chuan thuchhuah siamin, ZPM sorkarin kawng siam a ngaihthah avangin mipui náwlpuiin harsatna nasa taka an tawh nasat thu leh pawi an tih thu an tarlang.

MPYCC chuan, ZPM sorkar hnuaiah Aizawl leh Mizoram hmun hrang hranga kawngpui a chhe hle tih sawiin, "Fûr lai a nih vang ni loin, mimal induhsak zawkna avanga hna hrang hrang an thawh laiin khawpui chhung leh pawn kawngpui a ngaihsak lo hle. Fûr lai chhuanlama hmanga kawngpui a ngaihsak lo hi lirtheia eizawngte leh mipui an ngaih pawimawh lohzia a tichiang hleah kan ngai," an ti.

December 15, 2018-a MNF sorkar lak luh a nih khan ministry hmasa Congress sorkarin kawngpui siamna tur sum PWD-ah nuai 8,595.19 a hnutchhiah nia sawiin MPYCC chuan, "MNF sorkar liam ta khan sorkar thara kawngpui siamna atan PWD-ah cheng engzat nge a hnutchhiah ve tih hi Congress ṭhalai zawhna a ni," an ti a; MNF sorkar kal ta khan sum a hnutchhiah lo nge, ZPM sorkarin kawng siamna tur pawisa a nei lo tih chu an zawhna a nih thu an sawi.

MPYCC chuan, Congress-in rorelna an chelh laiin January-April inkarah Aizawl khawpui kawngte siam vek a ni ṭhin nia sawiin, "Fûr thlen hmain fel taka zawh a nih ṭhin avangin Aizawl khawpuiah inkalpawhna kawng chhia sawi tur a awm ngai lo. Kumin 2024 hi kum 30 chhunga Aizawl khawpui kawng chhiat ber kum a ni," an ti.