Aizawl kawng chhia siama hnatlang MNYF-te ZPM Ṭhalaiin fakawm an ti

ZPM Ṭhalai chuan thuchhuah siamin, Aizawla kawngpui chhe laite MNF ṭhalaite'n an siam chu fakawm an tih thu an tarlang a, "An sorkar laia an lo harh chhuak zo lo erawh pawi kan ti," an ti.

ZPM Ṭhalai chuan, "MNF sorkar laia an hnathawhte ngei kha an opposition hnua ṭha tâwk loa ngaia siamṭhat hna thawk tura hnatlang an ko ta rup hi lawmawm kan ti. An sorkar chhunga Aizawl khawpui chhunga an kawngpui siam ṭhenkhatte'n fûr khat êm pawh a daih lo ṭhin erawh hi chu a pawi kan ti," an ti a; tun kawngpui chhiaa harsatna chu MNF sorkar 'lu pán hnathawh' rah nia an ngaih thu an tarlang.

MNF sorkar chhunga an sûlhnu bâl leh pawr tak tak thenfai ngai leh siamṭhat ngai tam tak MNYF-te'n an lo ensan tawhte eptu an nih veleh an hre chhuak thar nia sawiin ZPM Ṭhalai chuan, "A kuma kum hmalak ngaihna hre loa an lo ensante kum khat pawh la sorkar lo ZPM, mipui sawrkar thawh zawhtir nghal vek an tum hi mahni mawng hlìmna mai a ni. An sûlhnu pawr tak takte siamṭha turin ZPM sorkar chuan theihtawpin hma a la mek a, sûlhnu bâl thenfai tur a tam em avangin duh angin hmalakna a kal chak hlei thei lo mai chauh a ni," an ti.