KHAWTHLIR

Thisen pe
Ramhlun North Taxi Stand Welfare Association chuan an kum 18 tlin lawm nan, nimin khan Aizawl Civil Hos­pital-ah thisen unit riat an pe a, an veng chhung­a chhungkaw harsa pangate ṭanpuina an pe bawk.

Tlangnuam traffic
Vawiin aṭangin sikul ṭan hma a nih dawn vangin Aizawl Traffic SP leh Tlangnuam local council ruahmanna in Kulikawn leh Tlangnuam inkar chu zing 6:45 - 7:45m inkarah eng lirthei mah a chho zawngin tlan phal a ni dawn lo.

Principal pension
T Romana College principal, Dr F Lalhmingsanga chu nimin khan superannuation pension-in a chhuak a; Thawh­ṭanni khan a thawhpui­te'n amah thlahna hun an hmanpui.

Audio Bible
Bible Society of India, Aizawl Auxiliary chuan thuchhuah siamin, Bible ngaihthlak theih chi, audio Bible lei tur an nei. Bible voice chu a man Rs. 2,500 a ni a, smart card pendrive chu Rs. 700 man a ni.

In delh chhia
Nimin chawhma dar 11 vel khan Kolasib Diakkawnah ruahsur leh thli tleh vanga thing tluin chhungkaw pathum luah lai in pakhat a delh chhia. In neitu hi H Fimchawia (L) a ni a, Zohmingthanga, Lalramhluni leh Lalremthanga te chhungkuain an luah a ni.

New Eden enfiah
Environment & Forests minister Lalrinmawia Ralte chuan March 30 khan Mamit district-a New Eden khuaa National Highway 44-A kawngpui laih thar turin a tihchhiat tur mihring chenna inte a enfiah a, kawngpui laihin a tihchhiat tur chhungkuate insawnna tur hmun a en bawk.

MPSC member Rev. Zosangliana
Mizoram sorkar-in MPSC member atan Rev. Zosangliana Colney a ruat tharna lehkha chu nimin khan DP&AR-in a tichhuak.