Thawrum thawhna kan thlawp lo - SHDC Chairman

Sinlung Hills Development Council (SHDC) chairman Hmingchungnunga chuan, Hmar mipuite'n tharum thawhna leh ralthuam chelekna reng reng an thlawp loh thu a sawi.

MPCC-in nimina Hawla Auditorium-a HPC(D)-in police pathum an thahte sûnna hun an buatsaihah thu sawiin Hmingchungnunga chuan, "HPC(D)-te thil tihah hian Hmar mipuite an lungawi lo. Hmar fa, Manipur leh Assam-a awmte pawhin hetiang thil hi an thlawp tawh lo," a ti.

Hmingchungnunga chuan, tun hmain HPC leh Mizoram sorkar an inkah ṭhin thu sawiin, "Inremna kan neih hnua a kawhmawh báwla kal reng chu HPC(D)-te an ni. HPC-(D) hi an phel a, Lalhmingthanga kaihhruai leh H Zosangbera kaihhruai an ni," a ti a; March 28, 2015-a pawi khawihtute chu H Zosangbera kaihhruaite an nih thu a sawi.

Hmingchungnunga chuan, Mizoram chhung­ah tharum thawhna leh ral­thuam chelek a hun tawh lo tih sawiin, "Heng thil hi a reh theihna atan kan theihna zawng zawngin Mizoram sorkar kan thlawp dawn a ni," a ti.