Health Minister-in ART Centre 3 a hawng

Health minister Lal Thanzara chuan nimin khan Health Worker Training School hall-ah Kulikawn Hospital, Kolasib District Hospital leh Mamit District Hospital-a Anti-Retroviral Therapy (ART) Centre din tharte a hawng. Lal Thanzara chuan, ART-ah HIV vei mi 8,226 an inziak lut tawh tih a sawi.

Health Minister chuan HIV/AIDS chu natna khirh, tihdam theih loh ni mah se, thunun theih leh a veite nunkhua pawhsei theih a nih thu a sawi a, "He natna vei tam tak hi mi harsa tak takte an nih avangin an ban phâka an inenkawlna tur ART Centre dah sorkarin a tum a ni," a ti.

Lal Thanzara chuan, Aizawl, Champhai leh Lungleiah ART Centre a awm tawh a, tunah Kulikawn, Kolasib leh Mamit-a hawn a nih leh hnuah, Serchhip, Lawngtlai leh Saihaah pawh dah tum a nih thu a sawi a; hrisel loh chuan ramin hma a sawn thei lo tih sawiin, "Sorkarin hriselna lamah theihtawpin ṭan a la a, mahse sum a tam tawk loh vangin harsatna a awm a ni," a ti.

Minister sawi danin, February 2015 thleng khan Aizawl, Champhai leh Lungleia ART Centre-ah HIV+ve mi 8,226 an inziak lut tawh a, tun dinhmunah ART damdawi la mek mi 3,624 an awm.

Health department chu mi zawng zawng nghen a nih avangin mipuiin an ngaihven bik tih sawiin, Lal Thanzara chuan, "Opposition party-te phei chuan min en uluk hle a, a lawmawm a ni," a ti a; thawktute chu an thil tih apiangah mipui mit a fu reng a ni tih hriaa ṭan la zual zel turin a fuih.

Lal Thanzara chuan, doctor leh nurse indaih lohna tihziaawm tumin sorkarin ṭan a la mek tih sawiin, National Health Mission hnuaiah doctor leh thawktu dang tam tham zawk lak belh tuma hmalak mek a nih thu a sawi a; doctor awm lohna damdawi-in (PHC)-te chu a bul hnai damdawi-ina doctor-te hmui rih tura tih an nih thu sawiin, "Hmun kilkhawrah kum hnih aia tam an awm lohna turin ruahmanna siam mek a ni," a ti.

Health Minister chuan, thisen sawngbawlna man unit khata Rs. 550 lak chu hrethiam duh lo luiah eptu party-te a puh a, "Ram hruaitu la nih tum tan loh theih loa Rs. 550 lak hi hriatthiam loh tur a awm lo. Chiang takin sawifiah a ni tawh a, sorkar demnaa hman zui tum tlat leh mawihnai lo taka 'thisen man' tih phuaha sorkar hmalakna beih chiam hi mi puitling lo thawmhnaw a ni," a ti.

Health secretary Arun Goyal pawhin thu sawiin, tun hnaiah Mi­zo­­rama AIDS/HIV vei zat tlahniam hret hret tura an beisei laia a pung zel zawk chu pawi a tih thu a sawi a, "AIDS/HIV tihtlemna kawnga hmalakna hi MSACS kutah ringawt nghah a ngamawm lo a, medical officer, staff zawng zawng leh mi tlawmngaite'n an ngaihven a hun tak zet a ni," a ti.

Technical report petu, MSACS project director Dr Lalmalsawmi Sailo chuan, Mizoramah October 1990-ah HIV vei hmuh ṭan a nih thu a sawi a; tun dinhmunah Mizoramah HIV vei leh vei loh endikna, testing centre 35 a awm mek thu leh ART Centre chu kum 2006-ah neih ṭan a nih thu a sawi bawk.