A party mite'n Brig. T Sailo an sûn

MPC chuan nimin khan an party office-ah Leaders Meet an nei a. March 27, 2015-a thi ta, an party dintu leh president hmasa ber Brig. T Sailo sûnna hun an hmang.

MPC chuan, "Brig. T Sailo hi a hun taka Mizo mipuite ṭanpui tura Pathianin Zofate tan min pek a ni tih kan pawm a, sipai hlauhna lak ata min chhanchhuah bakah, Mizoram chawisan a tumna policy - Six Basic Needs te, Zohnahthlak insuihkhawm lehna atana a hnathawh te, ramri chung­changa a dinnate kan thlawpin a hlawhtlin nan hma kan la zel ang," an ti a; chawimawina a dawn zawng zawngte chu a phû hlea an ngaih thu an tarlang.

Brig. T Sailo sûnnaah hian MPC hruaitute - Lalthanliana, K Lianchia, Lalrinzuala, Lalthansanga leh C Lalsawivunga ten thu an sawi a; ZORO president R Thangmawia'n thu a sawi bawk.

MPC chuan, Mizorama V/C leh local council inthlan lo awm turah MPC party mi leh sa leh Brig. T Sailo sûntu zawng zawngte chu MPC party candidate-te lo ṭawiawm ṭheuh turin an sawm a ni.