Zotlang Sports Complex hawn a ni

Mizoram State Sports Council (MSSC)-in cheng nuai 100 sênga Zotlang Sports Complex an siam thar chu, nimin khan Sports & Youth Services minister Zodintluanga'n a hawng.

Hawnna inkhawm hi SYS secretary Zothankhuma'n a kaihruai a; Zodintluanga chuan, "Mizoram sorkarin ṭhalaite hmakhua ngaiin infiamna lama hma an sawn theihna atan kawng hrang hrangin theihtawp a chhuah a, harsatna hrang hrang paltlanga Zotlang Sports Complex siam zawh a ni hi a lawmawm hle," a ti.

Khualzahawm parliamentary secretary K Lalrinthanga chuan, "Minister chak tak hnuaiah infiamna chi hrang hrang atana hmun changtlung tak tak Mizoramah siam a ni hi a lawmawm hle. Ram pumah pawh Mizo infiam mi ten hriat an hlawh tawh hi a hlawhtlinna a ni," a ti a, infiammite chuan infiamna hmunhma sorkarin a siam teh hmang ṭangkai turin a fuih.

Zotlang local council chairman C Lalzamlova chuan, Sports Complex a hlawhtlin theihna atana hma latu zawng zawngte hnenah lawmthu a sawi. Hawnnaah hian bialtu councillor Lalzirliana leh MSSC secretary C Laltlanthanga-te pawh an tel.

Zotlang Sports Complex-ah hian basketball court leh tennis court a awm a, mipui ṭhutna 250 siam a ni.