Fire Service Week pualin ngenna siam

Mizoram sorkar chuan April 14-20, 2015 chhunga hman Fire Service Week hman tur pualin thuchhuah siamin, ngenna an siam a, an ngennate chu zâwm vek turin mi tin an ngen.

Sorkar chuan, mei tel loin mihring a awm theih loh tih sawiin, "Mei hi mi tin tana pawimawh leh ṭangkai a ni. Kângmei erawh mihringte tan chhiatna, piansualna leh thihna hial thlen a, ro hlu, in leh lote meivâpa chantirtu a ni," a ti.

Sorkar ngenna:
In chhuahsan hma leh zan mut hmain kângmei tichhuak thei thilte enfel hmasa ziah rawh.
Gas (LPG) fimkhur takin hmang la, a pût a nih chuan hmang lui suh. Gas hman loh laiin a regulator-ah off ṭhin tur a ni.
Electric wiring ṭha lo hi kângmei tichhuak thei a nih avangin, a thiamte chauh khawihtir ṭhin rawh.
Parda, thosilen leh puanzar bulah mombati, bati chhit loh tur. Petrol, khawnvartui, diesel hmang fimkhur la, mei bul hnaiah dah suh.
Circuit breaker (MCB) hman ngei tur a ni a, fuse wire pawh a dik tak chauh hman tur a ni.
Mei nung lai reng reng ngaihthah loh tur, meizial bung paih fimkhur la, a nung chungin paih suh.
Mei chhêmna thil - nawalh, lighter-te naupang khawih phakah dah loh tur.
In leh a velah kângmei tichhuak thei en fel ṭhin la, khaw daifêm deuha awm i nih chuan ram kâng laka i him nan i in bul zau tawk tak tifai ang che.
Electric istiri, heater, room-heater, geyser, electric stove, immersion heater hman lai ngaihthah lo la, i hman zawhah off ringawt loin a plug phawi ṭhin ang che.
Kângmei a chhuahin chî-âi mai lo la, rang takin in chhunga mite leh ṭhenawm hnaite hrilh vat la, fire station hnai berah fiah leh rang takin kângmei chhuahna hmun hriattir ang che.