Aizawl tlâk lam thlî sâwngbâwlna tur Project thawh ṭan tur tlangzarh a ni

Aizawl tlak lama veng eng emaw zatte septic tank thlî lak khawmna leh sawngbawlna tur, 'Small Bore Sewerage & Septage Treatment for Aizawl Zone-7' chu hna thawh ṭan turin nimin khan UDPA minister K Sapdanga'n Taxation Auditorium-ah a tlangzarh.

UDPA department-in AMRUT 2.0 hnuaiah Small Bore Sewerage & Septage Treatment for Aizawl Zone-7 atan cheng vbc. 39 a hmu a, first instalment vbc. 29 dawn a ni tawh a, kum hnih chhunga siam zawh tur a ni. UDPA kaltlanga sum hmuh ni mah se, PHE department-in an kalpui dawn a; siam zawh hnuah kum thum chhung chu a siamtu company-in an enkawl zui ang.

UDPA Minister chuan, Small Bore Sewerage & Septage Treatment project thar chu phûrawm a tih thu a sawi a, "Project hi kan hriselna leh kan nunna atana ṭangkai, kan dam chin khawih thil a ni a, project phûrawm ber niin ka hria. Kan hlawhtlinpui ngei ka beisei a, kan hlawhtlinpui chuan a dang zel pawh a awm thei ang. Kan dam chen pawh a sei sawt ka beisei," a ti.

K Sapdanga chuan, sorkar hma­lak­nate chu mipuiin an hriat loh chuan harsatna a awm ṭhin thu sawiin, "Project zawng zawngah sum ruahman zat aṭanga 2% hi publicity (mipui hriata puanzarna) atan dah ṭhin a ni a, hei hi kan technical mite hian an hrethiam ṭhin lo a, an hriat chian loh ṭhin avangin an namnûl ṭhin a, project a hlawhtlin tâwk loh phah ṭhin," a ti a; publicity lam theih­nghilh lo turin a chah.

Aizawl khawpuia thlî chu mipuiin an in leh tih sawiin UDPA Minister chuan, "Kan taksa aṭanga chhuak hi kan káah a lut leh ngei ngei a, keimahni aṭanga a chhuah aṭanga kan káa a luh leh inkarah hian engtin nge kan sâwngbâwl tih hi a pawimawh tak zet," a ti a; project chu hun ruat chhung ngeia ṭha taka zawh hman a ṭul thu a sawi.

PHE minister Prof. Lalnilawma pawhin thu sawiin, Sewerage & Septage Treatment project thar chu mipui vantlang hriselna tur thil tak tak a nih thu a sawi a, "Project hi community project a ni a, mipui ta, khawtlang ta a ni a, a chhawrtu tur chu mipui kan ni," a ti a, Aizawl tlâk lam vengte thli sâwngbâwlna leh Aizawl tui lâkna tihthianghlimna tur a nih thu a sawi.

Prof. Lalnilawma chuan, project atana sum hai chhuaktu chu UDPA niin, PHE-in a siam hna an thawk dawn tih sawiin, a chhawrtu tur khawtlang chu hna thawhte lo enpui turin a chah a, "He kan project hmasa ber hi a hlawhtlin theih nan theihtawp i chhuah tlang ang u," a ti. Thli luang khawm tur chu septic tank aṭanga tui chhuak (soakpit-a lut ṭhin) a nih thu leh, septic tank-a êk paih ṭhinte tan paih theihna tur a nih thu a sawi bawk.

Inkhawm hi PHE secretary F Liantluanga'n a kaihruai a, UDPA secretary Lalmalsawma Pachuau pawhin thu a sawi a, PHE engineer-in-chief Lalrothanga'n project tlangpui a sawifiah. Minister of state Lalnghinglova Hmar, MLA pahnih VL Zaithanzama leh TBC Lalvenchhunga, Aizawl DC Lalhriatpuia, sorkar official-te leh project kalpuina tur veng khawtlang hruaitute an tel a ni.

Master Plan for Aizawl Vision 2030 siamah Aizawl khawpui chu zone pakuaah ṭhen a ni a, Zone-6 ah zun leh êk sawngbawlna tur project chu SIPMIU-in Aizawl chhuah lam veng eng emaw zat tan an kalpui tawh a, Chite lui kamah sawngbawlna hmun siam siam a ni.

Small Bore Sewerage & Septage Treatment for Aizawl Zone-7 hnuaiah hian local council 11 - Dawrpui, Chawnpui, Tuikual North, Tuikual South, Dinthar, Dawrpui Vengthar, Vaivakawn, Kanan Veng, Khatla, Mission Veng leh Zarkawt-te a awm. Heng veng 11-a septic tank thli lak khawm a ni dawn a; veng ṭhenkhat erawh chu veng pumpuiah kalpui theih a ni dawn lo thung.