Khalh ngil kan ngai - Minister Dr Vanlalthlana

September 5, Ningani zan khan ZPM Media, IT and Publicity department leh Mizoram Journalists' Association member-te an inkâwm a; IPR minister Dr Vanlalthlana bakah, minister of state pahnih B Lalchhanzova leh Lalnghinglova Hmar ten an telpui. IPR Minister chuan, khalh ngil an ngaih thu sawiin, RTI hmang tam turin chanchinbumite a chah.

Aijal Club-a inkawmhona hi ZPM Media, IT and Publicity department-in inhmelhriatna leh inṭhian ṭhatna atana an buatsaih a ni a; pawl pahnih member-te aṭangin an ngaimawh leh ngaih pawimawh zawng te, kalphung leh hmalakna atana ṭha tura ngaihte sawiho a ni.

IPR Minister chuan, journalist-te'n fourth estate an nihna an hriat chian a ṭul thu leh huaisen taka an kal a ṭul thu sawiin, "Sorkarna dik leh ṭha kalpui tur chuan khalh ngil kan ngai. Ṭan rawn la zel rawh u," a ti a; rorelna ṭha leh dik a awm theih nan thawhpuiah a sáwm bakah, sorkar khalh ngil nan RTI Act hmang tam turin a chah.

Journalism-in mipui hnenah thu dik a lantir a ngaih thu sawiin Dr Vanlalthlana chuan, "A hlâwkna téltu chu mipui an ni. Mipuiin thutlukna dik an neih theih nan information ṭha leh dik an neih a ngai a, information pe theitu ber chu journalist-te in ni," a ti. Whatsapp leh social media-a thil thehdarhte chu a dik leh dik loh chanchinbu leh TV chanchin tharte hmangin mipuiin an finfiah ṭhin tih sawiin, "Journalist-te thu chhuahte hi mipuiin rintlak bera an ngaih a ni," a ti bawk.

Minister B Lalchhanzova chuan, thil ti dik lo thei, chesual thei vek an nih avangin tih dik lohte inhrilh a, inhauh bawrh bawrh ni se a duh thu a sawi rualin, mimal inhuat phah nan erawh hman loh a duh thu a sawi.

Lalnghinglova Hmar pawhin, social media-a thu leh hla darh chak tak karah traditional media-te pawimawhna a zual tulh tulha a hriat thu sawiin, ṭan la zual zel turin journalist-te a chah a ni.