Mizoramah helicopter service tihpun tum

Adviser to CM (technical) H Ginzalala, MLA chuan September 3 aṭanga nimin thleng khan Delhi-ah sorkar laipui hotute a dawr a, Mizoram mamawhte a thlen. Mizoramah helicop-ter service awm mek bakah a dang pakhat pek belh an tum thu Ministry of Home Affairs (MHA) hotute'n an lo hrilh.

Chief Minister-in Mizorama helicopter service changtlung leh tam zawk a awm theih nana hma a lo lak tawhnate bawhzuiin H Ginzalala hian MHA leh Civil Aviation hotute a kâwm a; MHA hotute'n helicopter service dang pakhat pek belh an tum thu leh, Mizoram sorkarin lehkha tihfel ngai la awmte a tihfel hunah tender theih a nih dawn thu an lo hrilh a ni.

Champhai North bialtu MLA H Ginzalala chuan Ministry of Road Transport & Highways minister Nitin Gadkari hmuin, Champhai Khankawn - Kanan Veng inkar kawngpui chungchang leh Mizorama NHIDCL hmalakna hrang hrangte a sawipui. Department of Agricultural Research & Education secretary Dr Himanshu Pathak, Indian Council of Agriculture Research (ICAR) director general chu Lunglei, Champhai leh Saitual district-a Krishi Vigyan Kendra (KVK) din chungchang a sawipui bawk.

Ginzalala hian Ports, Shipping and Waterways minister Sarbananda Sonowal leh Inland Waterways Authority of India (IWAI) chiarman Vijay Kumar te pawh a kâwm a, Mizorama lui hmanga inkalpawhna tura ruahmannate a sawipui a ni.