MSCW Chairperson lakah FIR thehlut

Mizoram State Com­mi­ssion for Women chairperson C Lal­chhan­dami kum zat chung­chang­­ah MNF party chuan an secretary C Lalrinpuia hmingin nimin khan Bawngkawn Police Station-ah FIR an thehlut.

MNF party hotute chuan, Lalchhandami'n MSCW chairperson hna a zawm dawnah kum 1960-a piang angin birth certificate a thehlut tih Social Welfare Minister-in a sawi avangin birth certificate lem siam a ni ngei nia an hriat avangin police-ah FIR an thehlut tih an tarlang.

MNF chuan, C Lalchhandami chu AH&Vety department-ah research officer a nih laiin March 31, 2016 khan a pension tih sawiin, "Hemi aṭanga chhût hian March 2024 thlaa MSCW chairperson atana ruat a nih khan chairperson ni tura MSCW Rules-in kum bithliah a tarlan kum 65 a pêl tawh ngei tih a chiang," an ti.

C Lalchhandami'n kum 1960-a piang a ni tih tarlanna birth certificate sorkara a thehluh thu Social Welfare Minister-in a sawi avangin C Lalchhandami'n birth certificate lem a siamtir nia a lan thu sawiin MNF chuan, "Document lem (forged document) hmanga sorkar bumna lian tak a thleng ngei niin a lang," an ti a; BNS Section 336, 337 leh 339 bawh­chhiatna a nih theih thu an tarlang.