Mipui awlsamna thlentu a nih theih nan a ṭul anga dan siamrem a ṭul - Chhanzova

Land Revenue & Settlement (LRS) depart­ment chuan nimin khan Aijal Club-ah SASCI hnuaia scheme kalpui dan tur zirhona an buat­saih a, LRS minister B Lalchhanzova'n a hman­pui. Minister chuan, LRS hnuaia dan leh inkaih­hruainate chu mipui awlsamna thlentu a nih theih nan a ṭul anga siam­rem a ṭul thu a sawi.

B Lalchhanzova chuan, LRS department-a thawk zawng zawng chu Mizoram tana ro hlu, mipuite'n malsawmna an dawn theihna tura ban pawimawh an nih thu a sawi a, "LRS hnuaia dan leh inkaihhruaina chi hrang hrangte hi mipui tana awlsamna thlentu leh an ban phaka chhawp chhuah a nih theih nan a ṭul anga siam rem a ṭul. Dan awm sa kan hman mekte hi khawi laiah nge siamṭhat zeuhin mipui tana phurrit a chhâwk zângkhai theih ang tih ngaihtuah reng a ṭul a ni," a ti.

LRS department officer-te chu tum neia thawk tura chahin Minister chuan, "Hunbi tiam neiin hmachhawp siam u la, a ṭul dan angin vil reng a ni dawn," a ti a; sorkarin dan kaltlanga mawhphurhna a pekte chu phurritah ngai lo tur leh an hun chhunga hnûhma ṭha hnutchhiah tum turin a chah.

Special Assistance to States for Capital Investment (SASCI) zirhonaah hian LRS under secretary Remlalliana Hnamte-in SASCI, DILRMP leh Survey of Villages and Mapping with Improvised Technology in Village Areas chungchang a sawifiah a; Digital India Land Records Modernisation Programme chungchang, e-ram chungchang leh Generation of Unique Land Parcel Identification Number chungchangte sawifiah a ni bawk.