Udhyog Samagam-ah Rodingliana a tel

Commerce & Industries Minister Conference (Udhyog Samagam - 2024) chu September 5, Ningani khan New Delhi-ah Union Commerce & Industries minister Piyush Goyal kaihhruaiin neih a ni a; Mizoram Commerce & Industries minister F Rodingliana a tel.

F Rodingliana chuan, Mizoram sorkarin industrial policy leh investment policy-te a duan thar thu leh investment ti duhte tan zau zawka kawng hawn a nih thu a sawi a, "Agro-based industry leh mau kaihhnawih industry lamah nasa zawka hmalak tum a ni a, sawhthing, aieng leh hmarcha thar chhuah a tam dawn avangin heng thlaite sawngbawlna tur pawh buatsaih mek a ni," a ti.

Mizorama industry din kawnga harsatnate sawiin Rodingliana chuan, India ram state dangte leh sorkar laipui hotute chu a theih ang anga Mizoram pui a, chhawmdawl turin a ngen a ni.

Conference-ah hian thupui chu ‘Ease of doing business' tih a ni a; state leh union territory hrang hrang hmalakna thlirho a ni. F Rodingliana hi Commerce & Industries secretary Dr Lalzirmawia Chhangte leh director Maria CT Zuali ten an ṭawiawm.