Politics-a thil awmzia hretute tan muhil thawh harh a hun tawh - MPCC President

Mizoram Pradesh Congress Committee (MPCC) president Lal Thanzara chuan, Mizorama hmasawnna lian zawng zawng chu Congress sorkar laia thleng a nia sawiin, tunlai politics-a thil awmzia hretute tan muhil thawh harh a hun tawh tak zet niin a sawi.

Lal Thanzara hian nimin khan Congress Bhavan-a political session-ah thu sawiin, Congress party chu Mizoram tana district council, union territory leh state petu a nih thu a sawi a, "Kan state ṭhenawmte el pha leh anmahni ang dinhmuna min dintirtu chu Congress a ni a, rambuai kum 20 kan tuar a, remna leh muanna thlen nana thawktu chu Congress a ni. Mizorama hmasawnna lian zawng zawng hi Congress sorkar laia thleng a ni," a ti.

MPCC President chuan, "Switzerland of the East min tiamtute min thlenpui chu kan hria a, Bangladesh of the South-ah min dah zawk a, MNF hi kan hotute'n i thawhpui tawh lo ang u an ti a ni," a ti a; Rahul Gandhi prime minister nih hun a hnaih zel avangin Congress hma lam hun a êng hle niin a sawi.

Lal Thanzara chuan, Chief Minister-in khawchhak lam unaute a duhsak thar viau nia sawiin, hriatthiam har an tih thu a sawi a, "Kan unau Zampui tlangdunga awmte chu ration card aṭangin a paih leh si. Hei hi em ni kalphung thar chu an ti a, hmangaihna mak tak chu a lo ni," a ti.

Congress President chuan, ZPM sorkar chu minister leh MLA-te chenna in chei ve lo tura an insawi laiin an chei nasa niin a sawi a, "Sorkar hi sum leh pai lamah a pachhe ta em em mai hi thil mak a ni, tunah hian ICU-ah ventilator hmanga nung hram hram ang a ni," a ti. Chhiah tisang lo tura insawite'n oil chhiah an tihpun thute a sawi bawk.

MPCC vice president C Ngunlian-chunga pawhin thu sawiin, ZPM sorkar chu enchhin enchhin sorkar niin a sawi a, "Thil hre lote'n an la ṭan hle a, mahse, hun a kal anga, an chan hi a chhe telh telh dawn. Bêl keh phuar khawm ang mai an ni a, an daih rei dawn lo," a ti.