Thil zirte intodelh nan hmang turin Minister-in zirlaite a chah

Women's Polytechnic, Aizawl Students' Union (WPASU) chuan September 5, Ningani khan an multipurpose hall-ah zirlai tharte lawmna, Freshers Social an hmang a, Higher & Technical Education minister Dr Vanlalthlana'n a hmanpui. Minister chuan, zirlaite chu an thil zirte ei hmuh nan leh intodelh nan hman thiam tum turin a chah.

HTE Minister chuan, zirlaite chu an thil zirte hmanga eizawnna kalpui thiam turin a fuih a, "Sorkar hnain min daih vek lo a, chuvangin, in course kalpuite hi mahni intodelha ei hmuh nana hman thiam tum ang che u. Khawvel hmasawn zel leh hnathawhna tur mil zelin inher rem thiam u la, marketing leh entrepreneurial rilru put a pawimawh," a ti.

Sumdawnna leh thil zirte suih zawm thiam chu eizawnna ṭha tak nei tura ṭul a nih thu sawiin Minister chuan, "Tum mumal tak leh ruahmanna felfai tak siam u la, huaisenna, beidawn duh lohna leh tawrh chhelna nen hma lam pan zel ang che u," a ti a; tun aia ṭha zawk leh hmasawn zel tura ṭan la turin a fuih.

Inkhawm hi WPASU vice president Lalmalsawmtluangi'n a kaihruai a, Women's Polytechnic principal B Lalhmuakluaia pawhin thu a sawi a ni.