KHAWTHLIR

Thisen pe

Mizoram Christian College NSS unit chuan nimin khan an college-ah thisen pek an huaihawt a, Civil Hospital, Aizawl tan thisen unit 126 an pe a, petute mipa 91 leh hmeichhia 35 an ni. Lunglei Higher Secondary School NSS unit pawhin nimin khan Lunglei Civil Hospital tan thisen unit 49 an pe a, petute mipa 35 leh hmeichhia 14 an ni.

Naupang inkhawmpui

Mizoram Presbyterian Kohhran chuan naktuk Pathianni hian pastor bial hrang hrangah naupang sunday school inkhawmpui an nei dawn. Naupang inkhawmpuiah hian Pathian thu, hla leh thu inchháng hmangin inelna neih a ni dawn a, bial ṭhenkhatah chuan inelna anga kalpui a ni lo. Naupangte'n item hrang hrang an nei ṭhin bawk. Thingtlang lam bial ṭhenkhatah chuan inkhawmpui hi zaninah an ṭan ang. Naupang inkhawmpui hi kum 1931 khan Aizawla Tlangnuam kohhranah neih ṭan a ni.

Ṭanpuina sem

Hnahthial district fisheries development officer George Lalnuntluanga hoin nimin khan Hnahthial district-a sangha dil thar siam leh sangha no siam ṭanpuina dawng tura thlan mi 26-te hnenah Pradhan Mantri Matsya Sampada Yojana kaltlangin ṭanpuina pek a ni a; hmalak dan tur inhrilhfiah nghal a ni.

Water cooler pe

Adviser to CM TBC Lalvenchhunga, MLA chuan nimin khan a bial chhunga Mizoram Law College-ah tui tihthianghlimna leh dah vawhna (water cooler) a pe. TBC Lalvenchhunga hian a bial chhungah water cooler 33 leh computer set 17 a pe tawh a ni.

Free clinic

Mizoram University Social Work (3rd semester) zirlai, Armed Veng South MHIP leh Armed Veng South MUP-te chuan nimin khan Armed Veng South community hall-ah a thlawna inentirna an buatsaih a, mi 200 chuang an inentir. Free clinic atan hian bialtu MLA B Lalchhanzova'n damdawi man leh ṭul dangte a tum a, bialtu corporator Christina Roluahpuii Sailo-in Rs 5,000 leh Cord Nerc-i'n Rs 10,000 an pe a ni.

Record room

Secretariat-a department hrang hrangte'n lehkha pawimawh an khawih zawh tawh (closed file)-te an dahṭhatna tur 'Record Room' siam thar chu nimin khan chief secretary Dr Renu Sharma-i'n a hawng. Record Room hi Secretariat building-a hmun pathumah siam a ni a; department-te'n an closed file tihriral chi si lohte an dahṭhatna tur a ni.

Creche hawng

Gauhati High Court chief justice Vijay Bishnoi chuan nimin khan Gauhati High Court, Aizawl Bench-ah hmeichhia leh naupangte'n hamṭhatna ṭha zawk an dawn theihna tura din, Creche a hawng. Creche hi Mission Shakti, Aizawl Urban ICDS Project hnuaia Mizoram sorkarin a din a ni a; hawnna inkhawmah hian GHC judge Justice Michael Zothankhuma leh Justice Kaishik Goswami bakah, Women & Child Development hotute pawh an tel a ni.