Eptu MLA-te'n leivung paih an enfiah

Eptu MLA-te chuan, nimin khan Rangvamuala kawngpui chhak lama leimin ṭhin leh leivûng paihin March 31, 2015-a in pahnih a tihchhiatte a hmunah an en a; opposition leader Vanlalzawma chuan, "In pathum chhiat chhan hi natural calamity ni loin, man made calamity a ni,” a ti.

Rangvamualah hian eptu MLA Vanlalzawma bakah, Lalthanliana leh Lalrinawma te an tel a; Vanlalzawma sawi danin, Rangvamuala kawng chhak lama leimin thenfai hna thawh mek laiin Thawhlehni khan lei tawlhin in pathum a tichhia a ni. In chhiate chu LT Manga, VL Thahlova leh Hmangaihsanga-te luah lai a ni.

LT Manga sawi danin, March 30, 2015 khan Hmangaihsanga nen Aizawl DC-in a ko a, an in lama leivûng paih a nih tur thu a hrilh a; anni chuan an in lama paih lo turin ngen mah se, DC chuan a theih loh thu leh pawisa a awm loh thu a sawi a ni.

LT Manga sawi danin, an in lamah leivung an paih ta a, leivûng hian March 31 chhun dar 1 velah an in chu a déng chhe ta a ni. March 30 zanah leivûng paihtu JCB battery a chhia a, rinhlelh thilah Hmangaihsanga nen Vaivakawn police-te'n an man thu a sawi bawk.

MLA Lalrinawma chuan, leivûng paih chu mi dang tana a hlauhthawnawm a nih chuan an muang mai tur a nih thu sawiin, "Mihring tawrhna thlen tur leh harsatna a thlen loh nan ruahmanna fel tak an siam tur a ni a, lung lian tak tak tla tur dâwl nana pal chhete siam an siam ringawt hi mihring him nan a derthâwng hle a ni," a ti.

Opposition leader Vanlalzawma chuan Rangvalmual leivûng paihin in pathum a tihchhiat thu leh mi ṭhen­khatin harsatna an tawhte chu telephone-in PWD chief engineer a hrilh a; leivûng paih dan leh pal an siam dante chu enpui turin a hrilh.