MPC-in Mizote diriamah BJP an puh

MPC party chuan thu­chhuah siamin, Central-a BJP kahhruai sorkar chu politics-a phuba lamna hmanruaa Mizoram hmangah a puh a, "Mizo Kristiante diriamna leh hnuaichhiahna tak meuh­ah kan ngai," an ti.

MPC chuan, Central sorkar chu Mizoram hmasawnna leh tihchangtlunna lam ngaih pawimawhah nei loah an puh bawk a, "Mizoram Kristiante chenna ram a nih vanga sakhuana tarmit vuaha thlir fo lo turin kan ngen a ni. Thla 10 vel lek chhung­in Larsap sawm kan nei hman a, BJP sorkarin Mizoram min bâwl zân dan enin, kan ram leh hnam leh sakhua tan a him tâwk lo hleah kan ngai," an ti.

Tun hnaiah India ram state hrang hrangah Kristiante nêkchêpna leh dodalna a nasa nia sawiin, MPC chuan, "Biak-in suasamna te, Kristiante vauna leh rahbehnate a hluar hle. Union Home minister Rajnath Singh-a'n sorkar laipuiin India ram pumah bawng talh khapna dan kalpui an tum thu a puang tawh a, sakhaw zalenna ram tia chhàl India ramah Kristiante tan a rálmuan thlak loh ta hle," an ti a; BJP sorkar chu inenfiah thuai se an duh thu an sawi.