Rangvamual lei paihna

Aizawl District Di­sas­ter Management Authority (ADDMA) chuan, Rangvamuala leimin thennaa leivûng paihin in pahnih a tichhia nia sawi chungchang an sawifiah a; leivung paih chuan in deng deuh ṭhin mahse, technical thil avangin a paihna hmun sawn a remchang lo niin an tarlang.

ADDMA chuan, lei­minin a hnawh kawngpui chu NH-54 a ni a, Mizo­ram mipui 80% ni tin mamawh lak luhna kawng a nih avangin fûr hmaa chinfel a ngai tih an sawi a, "Leivûng hi furpui thlen hma ngeia mipui tana paih fai thuai a ṭul avangin mipui hriatthiamna leh ṭawiawmna ADDMA chuan a ngen a ni," a ti.

ADDMA chuan, leivung paihin a thlanga RCC building chu a den deuh ṭhin avangin in neitute'n ADDMA chairman hnenah lei­vung paihna chu sawn turin an ngen tih an sawi a, "Technical lam mithiamte'n a paihna hmun hi sawn theih niin an ngai lo a, chuvangin in neitu pawh a duh anga a in venhim nan fencing siam tur leh a senso zawng zawng ADDMA-in a tumsak tur thu a hrilh a ni. Leivung paihna sawn loh chhan hi pawisa harsat vang a ni lo," an ti a; leivung chu tuna paih a nih loh chuan furah leiminin a hnâwl theih dinhmunah a awm niin an sawi.

Leivûng paih dan chungchang chu As­sembly-a opposition leader pawhin ADDMA chairman a sawipui thu sawiin, ADDMA thuchhuah chuan, "DC chuan tun aia ṭhaa paih dan leh harsatna sutkian dan an hriat chuan thudawn an dawnsawn theih reng thu a hrilh a, mahse harsatna chinfel dan tak tak an hmu zo mai lo," an ti.

Leivung paihtu JCB chhia vangin police-te'n an rinhlelhte an ko a, mahse lock-up-a riahtir leh jail-a khung an awm lo niin an tarlang bawk.