KHAWTHLIR

MPSC member C Zorammuana
Mizoram sorkar chuan MPSC member atan C Zorammuana, IPS (rtd.) a ruat thar a, ruatna lehkha chu April 1, 2015 khan DP&AR-in a ti­chhuak. C Zorammuana hi kum 1983-ah Mizoram Police Service-ah a inziak tling a, IPS officer-a hlan kai a nih hnuah Deputy Inspector General of Police niin January 31, 2015 khan a pension a ni.

Thisen pe
Edenthar Veng branch KṬP-te chuan, Good Friday pualin Ningani khan Aizawl Civil Hospital-ah thisen unit 30 an pe a, a petute mipa 28 leh hmeichhia pahnih an ni.

Hnam dang endik
Champhai police, Champhai sub-headquarters YMA leh MZP headquarters-te chuan March 31 leh April 1 khan Champhai khawpui chhunga Inner Line Permit nei lo hnam dang dap chhuah beihpui an thlak a, hnam dang 140 an endik a ni.

Thiin chhar
Angeli Lalruatsangi (3) d/o Rohlupuii, Serchhip Chanmari Vengthar chu April 2, 2015 chhun dar 12 vela ruahsur tam laiin a bo a, hun eng emaw chen an zawn hnuah, Ningani zan zanlai vel khan an ṭhenawmte ek-in khurah thia hmuh a ni.

MNYF-in rál
MNF ṭhalai general headquarters hruaitute chuan, April 2, 2015 khan HPC(D)-te'n an kah hlum, police sub-inspector Zoramthara Khawlhring, Sakawrdai Police Station OC chu Khawzawl Dinthara an inah an rál.

Luiah tla hlum
Lalngheta (32), Ratu chu April 2, 2015 khan Tuivai leh Tuivawl infinnaah a tla hlum. Thu dawn danin, Lalngheta hi a ṭhiante pahnih nen sangha man tumin an thawk chhuak a, mau pûmah chuangin, Tuivai leh Tuivawl infinna suarah an chesual a ni.

CM secretary
Chief minister Lal Thanhawla chuan a political secretary atan KVL Siamkima a ruat thar.

Zozam Times
The Zozam Times chu an chanchinbu siamnaa kawlphetha lak luhna a chhiat avangin vawiin hian a chhuak thei dawn lo a; chhiartute hriat­thiamna an ngen.