Rialin in 280 vel a déng chhia

April 2, Ningani chawhnu lama ruahsur lai khan Lunglei district-a khawthlang lam, Dengsur leh Khaw­lêk khuaahte nasa takin rial a tla a, in 80 chuang a déng chhia a; Ser­chhip district-a Bungtlang khuaah rialin in 200 vel a déng chhe bawk.

Dengsur V/C member C Lal­sawmliana chuan, an khuaa rial tla chu artui aia liante a nih thu sawiin, an khuaa in awm 100 vel zinga 80 vel chu luah tlak lohin in chung a déng chhia tih a sawi a, in 20 vel chauh luah tlak a awm niin a sawi.

Rialin in a den chhiat, luah zui tlak loha chengte Dengsur V/C leh YMA-te'n an riahna tur an rua­hmansak a, Ningani zan khan hlawm hrang hrangin an riah khawmtir a ni.

Déngsur khaw bul, South Khawlêkah pawh rialin chenna in eng emaw zat a tichhia a, in pahnih chung chu luah tlak lohin a déng chhia. New Khawlêkah pawh in chhia a awm nual bawk. Dengsur leh South Khawlêkte hi bialtu MLA, minister Zodintluanga chuan nimin khan a tlawh nghal a ni.

Serchhip district-a Bung­tlang khuaah chuan rialin in 200 vel a déng chhia a, chung zinga in 70 vel chu luah zui tlak loh khawpin a chung rangva a déng chhia a ni. Bungtlang VCP R Lalsawma chuan rial tlate artui aia liante a nih thu a sawi.