Serchhip YMA-in Airtel Hnathawh an ngaimawh

YMA sub-headquarters, Serchhip hruaitute, April 2, 2015 zana an pisaa ṭhukhawm chuan, Mizoram hmun hrang hranga NH-54 kawngpui kama Airtel company-in optical fibre cable (OFC) phûmna atana an lai khuar chu an ngaimawh thu an tarlang.

Airtel-in OFC an phûm chungchangah hian Ser­chhip sub-hqrs YMA chuan, Serchhip DC kaihhruaina hnuaiah Airtel hotute leh agreement an siampui PWD (NH) hotute nen sawiho thuai an phût a; Airtel leh PWD-te chuan an pahnih inkara inremna an siam angin hma an la ṭha tawk lo ve vea an hriat thu an sawi.

Serchhip sub-hqrs YMA chuan, OFC phûmna tura lei laih vangin Aizawl-Serchhip tlangdunga lirthei tlante'n harsatna nasa tak an tâwk a, lirthei an chetsual phah fo tawh niin an sawi.

Serchhip YMA-te sawi danin, Airtel company chuan OFC phûmna tur lei an laih chu an hnawh muk leh tâwk lo a, lirthei tam takin an dái sual a, harsatna an tawh phah ṭhin a; an inremnaah, ni khata an vûr nghal zel theih tur chin chauh lai tura tih an nih laiin, an lei laih khuarte hnawh lohin rei tak tak an awmtir ṭhin a ni.