Dawrah zirlaibu kima lei tur a la awm lo Sikulte'n class I-IV subject a tlem an ti

Academic session 2015-16 atan April 1, 2015-ah sikul ṭan ni tawh mah se, tun thlengin zirlaibu a kima lei tur a la awm lo. Sorkarin syllabus thar anga subject zir tur a tihte chu a tlèm lutuk avangin sikul ṭhenkhat chuan an zâwm loa thu dawn a ni.

Thu dawn danin, Inrinni tlai thleng khan lehkhabu dawr hrang hrangah zirlaibu a kima lei tur a la awm lo a; lehkhabu dawr nghaktute chuan, class I-IV zirlaibu chhutu Mizoram Govt. Press-in an duhkhawp an pe thei lo niin an sawi. Zirlaibu zawrhna dawr ṭhenkhatah chuan zirlaibu lei tum intlarte pawh an awm a ni.

Mizoram sorkar thuchhuah tarlan danin, kum 2015-16 session aṭangin private school leh sorkar school-a class I-IV te chu syllabus thar hmanga zirlai thuhmun zir tura tih a ni.

Syllabus tharah chuan Mizo medium leh English medium-a class I & II-ah subject pathum - Mizo, English leh Mathematics chiah a awm. Class III & IV-ah Mizo medium-ah subject pali - Mizo, English, Mathematics leh Environmental Studies a awm a; English medium-ah subject panga - Mizo, English, Mathematics, Environmental Studies leh Hindi a awm thung.

Private school ṭhenkhat enkawltute chuan, sorkarin syllabus thar anga subject a thlan zat chu a tlem lutuk a, an duhkhawp loh thu an sawi a; anmahni remchan dan anga subject belh mai an duh thu leh, sorkarin syllabus thar a siam chu a standard a hniam hlea an ngaih thu an sawi bawk.

School Education department chuan March 28, 2015 khan kum 2015-16 atan sorkar school syllabus leh text book a siam a; chu chu sikul zawng zawng, sorkar leh private sikulte hman vek tura tih a ni. Sorkarin syllabus a siama subject-te bak subject dang zir belh phal a ni lo.