Electric hruipui ban pali a tlu

Power & Electricity superintending engineer Jolly Newman chuan thuchhuah siamin, March 2, 2015 aṭanga ruahsur leh thli tleh vangin Kolasib aṭanga Bairabi, Zamuang, Zawlnuam leh Kawrthah tlangdung kawlphetha pekna hruipui, 132 kV line, Kolasib Bâwktlang leh Bairabi inkarah ban pali a tlu tih a tarlang.

P&E SE chuan, electric ban tlûk chhan chu thli leh ruah vang a nih bakah, a part (tower member) eng emaw zat a bo ṭhen vang a nih thu a sawi a, "A ban pumpui chak tâwk loh vang a ni tih hmuh­chhuah a ni a, pawi kan ti hle. He thil ṭha lo thlenna chhana mawhphurtu zawn chhuah leh hetiang thil a thlen tawh lohna turin theihtawp kan chhuah ang," a ti.

Electric ban pali tlu siamṭhat nan thla khat leh a chanve vel a ngai dawn tih sawiin, P&E department chuan, Bairabi, Zamuang, Zawlnuam leh Kawrthah tlangdung khaw hrang hrangte chu thil awm dan hrethiam a, ṭha taka hna thawh a nih theihna atan department mite ṭawiawm turin an ngen a ni.