Ruihhlo do beihpui thlak turin CYMA-in SRS a din
Central YMA hnuaia central executive committee (CEC) nimina CYMA committee room-a ṭhukhawm chuan, ruihhlo do tura Supply Reduction Service (SRS) din rawtna an pawm. CEC hian ruihhlo vanga mante an chhuak leh hma lutuk ṭhin pawh zirchian an rel.
CYMA chuan tunlaiin ruihhlo a hluar nasat thu sawiin, "Ruihhlo hluar lutuk a ngaihmawh awm avang leh mi tam takin harsatna an tawh avanga hma la tura min ngen angin SRS hi din a ni leh ta. SRS hmalakna hi mitinte'n thlawp a, lo ṭawngṭai pui turin Mizo mipuite a sawm a ni," an ti.
Central YMA president Lalbiakzuala chuan Vanglaini palai zawhna chhangin SRS chu chak taka kalpui an tum thu a sawi a, "Mipuite puihna kan mamawh ngawih ngawih dawn a, an mi thlawpna kan ngen tak meuh meuh a ni," a ti a; SRS chungchangah hian CYMA chuan thurawn a dawn theih reng thu a sawi.
Lalbiakzuala sawi danin, SRS member tur hi June thla thleng atan ruat phawt a ni a, an hun a tawp hnuah a ṭul angin member ruat zel a ni ang.
CYMA hian ruihho do beihpui a thlak hmasak ṭumin SRS hi kum 2005 khan a din tawh a, kum 2008 khan tihtawp a ni. SRS member-te chuan November 1, 2008 khan CYMA hall-ah SRS thlahna hun an hmang.
SRS thlahna hunah hian hetih laia CYMA president Lalchungnunga chuan, YMA-in kumpuan a neih tak loh avangin SRS chu ṭhiah a ni tih a puang a, "YMA-in kumpuanah 'ruihhlo do' a hman hmain Mizoramah ruihhlo vanga thi mi 1036 an awm laiin, kum 2005 aṭanga ruihhlo do a nih hnuah mi 99 chauh an thi a ni. Kan hnathawh hi Mizo tan a hlu hle," tiin a lo sawi tawh.
SRS hian ruihhlo zuar an man bakah ruihhlo tam tak an man tel a, SRS-in beihpui an thlak hunlai hian Mizoramah ruihhlo zuarte an biru a, ruihhlo lei tur a vang a, a awm chhun pawh a man a to hle a ni.
Nimina CEC ṭhukhawm chuan ruihhlo vanga mante awlsam taka an chhuah ṭhin chu, "Mizorama ruihhlo zuarte leh damdawi khehte man an tawhin kar loah an chhuak leh thuai ṭhin a hriat a nih avangin, Central YMA chuan heng mite case leh an chhuah leh mai ṭhin dan chungchang zirchian ṭha a ti a, a ṭul angin thuneitute pawh kawm thuai nise a ti," an ti.
Zawhna chhangin CYMA hruaitute chuan ruihhlo avanga mante Court-in a chhuah dan chungchangte leh police leh excise-in chargesheet a siam ṭhin dante chuan CYMA chuan a zirchiang dawn a ni.