Sikul ṭan hma dodal lo turin ngen

School Education department hotute chuan, sikul ṭan hma avangin zir­laite harsatna siamsak lo turin Mizo Students Union (MSU)-te an ngen a; sikul ṭan hma chu kalpui zel tur a nih thu Vanglaini palai an hrilh.

School Educa­tion director K Lalthawm­mawia chuan Vanglaini palai zawhna chhangin, sikul ṭan hma chu thu­tlukna sawh sawn a nih loh chuan kalpui zel tur a nih thu a sawi a; MSU-te chu zirlai naupang tê tête tana harsatna siamsak lo tura ngenin, "Tuna MSU hmalakna hi naupangte zirnain a tawrh phah thei a, MSU-te hian an duh lohna an lantir tawh a, an duh dante mipuiin an hre tawh a, an dodalna hi duhtawk tawh se kan duh tak zet a ni," a ti.

Thu dawn danin, School Education depart­ment hian nimin tlai khan DEO, SDEO leh zirtirtute zawm tur hriattirna (instruction) a tichhuak a; chutah chuan DEO leh SDEO-te chu an huam chhung ṭheuhah zirlai nu leh pate sikul ṭan hma chu hrethiama zâwm tura ngen tura tih an ni. Zirtirtute pawh sorkar thutlukna chu ṭha taka zâwm a, ṭan hun dik taka ṭan tur leh, attendance ngaih pawimawh a nih tur thu zirlai naupangte hrilh­fiah ṭha tura tih an ni bawk.

Sikul ṭan tawh hnua zirlaibu lei tur awm kim lo chungchangah School Education director chuan, SCERT hmalakna a nih thu a sawi rualin, School Education department pawhin a theih ang anga an nawrpui thu a sawi a, "Theihtawpin ṭan kan la tlang a. A tira print zatin mamawh a pha lo deuh a, kan inchhût sual ve deuh a ni," a ti.

Hetihlai hian MSU chuan Mizoram hmun hrang hrangah sikul kai turte lo changin, sikul kai hun pangngaiah chauh kal turin zirlaite an ngen. Zirlai engemawzat chu an haw leh a, sikul ṭhen­khatah chuan zing dar 8 ah sikul ṭan theih a ni lo.