KHAWTHLIR
Thisen pe
Rulchawm branch KṬP chuan an din champha vawi 34-na lawm nan nimin khan Synod Hospital-ah thisen unit 49 an pe a, a petute mipa 43 leh hmeichhia paruk an ni. Isua Krista Kohhran Aizawl East bial pawhin nimin khan Aizawl Civil Hospital-ah thisen unit 27 an pe a, a petute mipa 23 leh hmeichhia pali an ni.
Press tour chhuak
Aizawl Municipal Council bultuma Shimla-a press tour neia kal tur, MJA member 10 leh AMC officer pahnihte chuan nimin khan Mizoram an chhuahsan a, AMC chairman CT Zakhuma leh MJA president Vanlalrema Vantawl ten an thlah liam. MJA member-te hian vawiinah Kolkata aṭangin Delhi an pan dawn a, Shimla-ah ni thum an chám ang a, April 10-ah Aizawl rawn thleng leh tura beisei an ni.
Naupang tla hlum
Nimin khan Lalhmingsanga (3) s/o Seldingliana, Baktawng Tlangnuam chu an êk-in khurah a tla hlum. Thu dawn danin, Lalhmingsanga hi nimin chawhma dar 11 velah a nu leh pate'n a awmna chin an hre lo a, an zawn hnuah chawhnu dar 3:20-ah an ek-in (pit latrine) khurah thia hmuh a ni.
News editor thi
MJA member Lalruatpuia Zadeng (37) s/o J Lawmzuala, Lunglei Chanmari, JB Cable-a editor-in-chief chu nimin zing dar 4:00 khan internal bleeding vangin Lunglei Civil Hospital-ah a thi a, nimin chawhnu dar 1:00 khan vui a ni.
Crusade tan
Nimin khan Zoram Thar Crusade chu Lammualah ṭan a ni a, zaninah Vanapa Hall-ah chhunzawm a ni ang a, April 10, 2015 thleng neih tur a ni. An thupui ber chu sual thupha chawia ṭawngṭai a ni.
Ruang chhar hria
April 3, 2015-a Phunchawng Mel-10 kawngpui thlanga mipa ruang chhar chu hun eng emaw chen tu nge a nih hriat loha a awm hnuah, Lalremruata (29) s/o F Lalzuithangi, Serchhip Chanmari a ni tih finfiah a ni.
YMA-in phût
YMA Central Executive Committee (CEC) nimina CYMA Committee Room-a ṭhukhawm chuan, sorkar laipuiin Mizoram Governor a thlak ngun lutuk chu Mizoram hmuhsitnaa an ngaih thu an tarlang a; a rang thei ang bera Mizoram Governor nghet ruat turin sorkar laipui an phût.
MZP-in dang dawn
MZP chuan vawiin aṭang hian Mizoram Governor thlak ngun lutuk duh loh lantirna atan, Mizorama Central sorkar pisa hrang hranga thawkte office kal tur an dang dawn. MZP-in an dan tur hi Central hnuaia zirna in, media leh force hrang hrangte a huam lo ang.
Ph.D hmu thar
K Lalhmingchhuanmawii d/o K Biaknawla, Lawngtlai Vengpui chuan Madras University aṭangin nimin khan doctor of philosophy a hmu a; a thesis title chu 'Studies on the effect of Punica granatum and Allium sativum on Cotylophoron cotylophorum (Fischoeder, 1901)' tih a ni.
LC notification
State Election Commission chuan, nimin khan April 30-a village council/local council inthlan tur atan notification a ti chhuak.