Hmar lam disturbed area-a puan dan tur sawiho

Home minister hoin nimin khan a pisaah police hotu liante an ṭhukhawm a, Mizoram leh Manipur inrinna bâwr vel hmun distrubed area-a puan dan tur leh HPC(D)-te dan páwna hnâwl an nih theih dan tur an sawiho.

Meeting-ah hian, Mizo­ram hmar tlangdung, Mani­pur ramri hnaih lam chu hmun ralmuang lo leh buai, disturbed area-a puan dan ngaihtuah ni se, an ti a; HPC(D)-te chu un-lawful or­ga­nisation-a puang turin sorkarah thlen ni se, an ti bawk.

Meeting chuan, Mizoram hmar lam tlangdunga police post zawng zawng chu tihchak a, a ṭul huna che nghal vek thei tura ralthuam ṭha zawka thuam dan tur an rel a; Sakawrdai, Saiphai, Khawlian leh Suangpuilawnah operation commander atan deputy SP chin police officer dah ni se, an ti.

Home department hotute chuan, Ṭinghmunah border outpost thar siam ni se, an ti a; police officer leh sipaite chu Vairengtea Counter Insurgency and Jungle Warfare School-ah training pek a, Assam Rifles-te nen tactical training nei se an tih bakah, advanced tactical area siam leh, hmun rálṭi leh fimkhur ṭul zualna hmuna MLA zin turte chu Chief Minister leh Home Minister hnenah inhriattir ngei ṭhin se an ti bawk.

Home minister R Lalzir­liana chuan, March 28, 2015-a a Assembly Assurance Com­mittee lambuntute chu H Zosangbera pawl HPC(D)-te an nih thu a sawi.