Hun tiam chhungin Sainik School zo lo Hnathawhna sum hmuh tur la kim lo

Chhingchhip rama Sainik School tur sak mek chu February 28, 2015-a zawh tura tih a ni a, mahse tun thlengin sak zawh a la ni lo. March, 2015 laihâwl thleng khan Sainik School-a awm tura ruahmante peihfel a la ni lo a, sorkar laipui aṭangin sum hmuh kim a la ni lo.

Home department aṭanga thu dawn danin, Sainik School sakna atan hian Non Lapsable Central Pool of Resources (NLCPR) hnuaiah cheng vbc. 50.64 leh Finance Commission aṭangin cheng vbc. 50 ruahman a ni. NLCPR hnuaia sum ruahman aṭangin Ministry of DoNER-in February 28, 2012-ah cheng nuai 1787 a rawh pe a, Mizoram sorkarin state matching share cheng nuai 198.59 chu June 7, 2012-ah a pe chhuak ve thung.

Ministry of DoNER vêkin second installment cheng nuai 1787.38 chu August 20, 2013-ah a pe chhuak leh a; third installment cheng nuai 893.66 pawh February 24, 2015-ah a rawn pe leh bawk.

13th Finance Commission aṭanga sum ruahman cheng vbc. 50 chu Mizoram sorkarin cheng vbc. 25 ve vea pe chhuak turin sorkar laipuia Finance Ministry a ngen a; Mizoram sorkar ngenna angin Finance chuan March 30, 2014-ah cheng vbc. 25 a rawn pe a, chu pawisa hman phalna chu Mizoram Finance department-in March, 2015-ah a tichhuak ve leh a ni.